Ўзбекистон коррупция даражаси бўйича Transparency International рейтингида ўз ўрнини 7 поғонага яхшилади

Transparency International коррупцияга қарши курашиш халқаро нодавлат ташкилоти 2020 йил якунлари бўйича ҳисоботини эълон қилди.

Рейтингда Ўзбекистон ўз ўрнини 7 поғонага яхшилаб, 180 та давлат орасида 146-ўринни эгаллади. 2019 йилда мамлакат 153-ўринда эди, 2018 йилда 158-ўринни,  2017 йилда 157 ўринни, 2016 йилда эса 156-ўринни эгаллаган.

Коррупцияни қабул қилиш индекси давлат секторида коррупция даражасини акс эттириб, у 100 балли шкалада баҳоланади. 0 балл коррупциянинг юқори даражасини, 100 балл эса аксинча, энг паст даражани билдиради. Баҳолашда қатор манбалардан, шу жумладан, экспертлар баҳолари ва ишбилармон доиралар вакиллари ўртасида ўтказилган сўровномалардан фойдаланилади.

Тадқиқот муаллифларининг таъкидлашича, COVID-19 пандемияси коррупциялашган ва авторитар раҳбарлар учун ҳукумат харажатлари устидан назоратни сусайтириш ва фуқаролар эркинлигини чеклаш учун баҳона бўлди.

Рейтингда коррупция даражаси пастлиги бўйича биринчи ўринни 88 балл билан Янги Зеландия ва Дания эгаллаган. Ундан кейинги поғоналарда 85 балл билан Швейцария , Сингапур ва Швеция жой олган.

Энг ёмон кўрсаткич 12 балл тўплаган Жанубий Судан ва Сомалида қайд этилган.

Марказий Осиё давлатлари орасида коррупция даражаси камлиги бўйича Қозоғистон 38 балл билан биринчи ўринда. Ундан кейинги ўринларни Қирғизистон (31 балл), Ўзбекистон (26 балл), Тожикистон (25 балл) ва Туркманистон (19 балл) эгаллаган.

Эслатиб ўтамиз, 2019 йилда Transparency International коррупцияга қарши курашиш самарадорлигини ошириш соҳасида Ўзбекистонга кўмак беришга тайёрлигини билдирганди.

Шавкат Мирзиёев коррупцияга қарши курашнинг янги тузилмаларини ташкил қилиш бўйича 2020 йилда ўтказган йиғилишда Ўзбекистон Transparency International  индексида охирги уч йилда 12 поғонага кўтарилган бўлса-да, ҳали бу иллат барҳам топмаганини таъкидлаган эди. Президент 2020 йил 29 декабрь куни Олий Мажлисга йўллаган Мурожаатномасида «Коррупцияга тоқатсизлик ҳаётимиз бир қисмига айланиши керак», деб айтганди. Давлат раҳбари 2021 йил 27 январь куни ўтказган йиғилишда бош прокурорга ҳудудларга коррупция бўйича «ташхис қўйиш» топшириғини берди.

Transparency International — коррупцияга қарши кураш ва бутун дунёдаги коррупция даражасини ўрганиш бўйича нодавлат халқаро ташкилотдир. Халқаро ҳаракат 1993 йилда Жаҳон банкининг собиқ директори Петер Айген томонидан Берлинда ташкил этилган. Ҳозирги кунда ташкилот дунёнинг 100 дан ортиқ мамлакатида ўз бўлимларига эга.