Тошкентда 1100 га яқин фуқарони 8 млрд сўмга чув туширган хусусий бандлик агентлиги мансабдорларига суд ҳукми ўқилди

Жиноят ишлари бўйича Яшнобод туман судида республика бўйлаб минглаб фуқароларни хорижга ишга юбориш билан алдаб, олинган пулларни ўзлаштириб юборган хусусий бандлик агентлиги вакиллари устидан суд ҳукми ўқилди. Бу ҳақда «Ўзбекистон 24» телеканали орқали маълум қилинди.

Эслатиб ўтамиз, 2020 йилнинг октябрида Тошкентда фуқароларни Корея, Япония, Латвия, Литва, Чехия, Нидерландия, Германия, Швеция, Словакия каби давлатларда иш топиб бериш ва ишга жойлаштиришни ваъда қилиб, жуда кўп миқдордаги пулларни фирибгарлик йўли билан эгаллаган хусусий бандлик агентлигининг кирдикорлари фош қилинган эди. Ўшанда жабрланган фуқаролар сони 1100 нафардан ошиши ва қўлга киритилган маблағлар 6,2 миллиард сўмни ташкил этгани тўғрисида хабар берилганди.

«Вазият 24» кўрсатувининг суд тергови жараёнига таяниб маълум қилишича, Recruit consulting work МЧЖ мансабдорлари жами 1087 нафар фуқарога 8 миллиард сўмлик моддий зарар етказган.

Суд ҳукмига кўра, мазкур хусусий бандлик агентлиги раҳбари Жаҳонгир Аллабердиев Жиноят кодексининг 168-моддаси (фирибгарлик) 4-қисми «а,б» бандлари ва 25, 168-модда (жиноятга тайёргарлик кўриш ва жиноят содир этишга суиқасд қилиш, фирибагарлик) 4-қисми «в» банди билан айбдор деб топилиб, 9 йилга озодликдан маҳрум қилинди.

Шунингдек, бандлик агентлигининг бошқа мансабдор шахсларига ҳам турли муддатларга озодликдан маҳрум қилиш жазоси тайинланган.

Судланувчи Алишер Эргашев ҳам Жиноят кодексининг юқоридаги моддалари билан айбдор деб топилиб, унга БҲМ (базавий ҳисоблаш миқдори)нинг 410 баравари миқдорида (91,43 миллион сўм) жарима жазоси тайинланди. У етказилган зарарларни ўз вақтида қоплаб бергани учун озодликдан маҳрум қилиш жазоси билан боғлиқ бўлмаган жазо чораси қўлланган ва суд залидан озод қилинган.

«Суд жараёнлари одилона ўтди деб ҳисоблайман. Айнан менинг ўзимни 44 нафар ўқувчим бор эди, шу ўқувчиларим орқали пул бериш масаласида ўртада туриб қолгандим. Шунинг учун охиргача келиб, жабрланувчиларга ўзимнинг ёнимдан зарарларни қоплаб бердим», — дейди Эргашев.

Суд хусусий бандлик агентлигининг ҳозирча мавжуд 600 миллион сўмга яқин пул маблағларини пропорционал тарзда тақсимлашни ва қолган қисмини айбланувчиларнинг қоплаш шарти билан ундирилишини билдирган.

Эслатиб ўтамиз, 2020 йилнинг октябрида Самарқандда хорижга ишга жўнатиш баҳонасида 300 дан ортиқ одамни чув туширган Amilee Bahora хусусий бандлик агентлиги раҳбарларига суд ҳукми ўқилганди.