Oliy va o‘rta maxsus ta’lim vazirligi ijtimoiy tarmoqlarda ba’zi oliy ta’lim muassasalari (O‘zMU, TDShU, FarPI, TATU Samarqand filiali) talabalari orasida koronavirus aniqlangani hamda fakultet va yotoqxona qavatlari dezinfeksiya uchun yopilgani to‘g‘risida tarqalgan xabarlarga munosabat bildirdi.
Avvalo, bu kabi xabarlar asossiz ekanini ma’lum qilamiz. Aytish joizki, xabarda ko‘rsatilgan oliy ta’lim muassasalari talabalari orasida ayni kunlarda koronavirus infeksiyasi aniqlanmagan va birorta ham talabalar turar joyi binosi yopilmagan.Vazirlik axborot xizmati doimo ijobiy xabarlarni tarqatishda hamkorlik qilishga tayyorligini ma’lum qilgan.Hurmatli ijtimoiy tarmoqlar faollari!
Haqiqatan ham, axborotni birinchi bo‘lib ommaga tezkor yetkazish davr talabi. Lekin har qanday xabarni emas, balki tekshirilgan, asoslangan ma’lumotlarni e’lon qilish – eng muhim jihat va jurnalistikaning “oltin qoida”si ekanini eslatib o‘tamiz!
Shuning uchun xabarlarni tarqatishdan avval biroz sabr qilib, aniqlik kiritib, keyin e’lon qilish, juda ham zarur bo‘lmasa, bu turdagi sovuq xabarlarni ommalashtirishdan tiyilish maqsadga muvofiq, deb hisoblaymiz!.
Chunki noto‘g‘ri talqin qilingan, hali to‘liq aniqlik kiritilmagan, shoshilinch tarzda tarqatilgan kichik bir xabar minglab yoki milllionlab insonlarda xavotir uyg‘otishi tabiiy, albatta. Nafaqat xavotir uyg‘otadi, balki shu kasallik o‘zida bor yoki yo‘qligi haqida shubha-gumonga borib, qo‘shimcha kasalliklar orttirib olishiga sababchi bo‘lishi mumkin.
Shu bilan birga, asossiz va yolg‘on axborotni tarqatganlik uchun O‘zbekiston qonunlarida ma’muriy va jinoiy javobgarlik normalari belgilanganini unutmang!
Qolaversa, Oliy va o‘rta maxsus ta’lim vazirligi hamda oliy ta’lim muassasalari bu kabi (kasallik aniqlanishi) holatlar jiddiy tus olib, keng tarqala boshlasa, ularni yashirishdan manfaatdor emas.
Oliy va o‘rta maxsus ta’lim vazirligi
Eslatib o‘tamiz, O‘zbekiston oliy ta’lim muassasalarida koronavirus pandemiyasi sabab 2020/2021-o‘quv yili 2-sentabrdan masofaviy shaklda boshlangandi. Respublika komissiyasining 2020-yil 12-noyabrdagi yig‘ilishi qaroriga muvofiq, barcha oliy ta’lim muassasalarida 2020-yilning 16-noyabridan oliy ta’lim muassasasi tomonidan ishlab chiqilgan chora-tadbirlar va reja-grafik asosida o‘quv jarayonini an’anaviy shaklda davom ettirish belgilandi. 2021-yil 11-yanvardan barcha OTMlar an’anaviy ta’limga qaytgan.
Izoh (0)