Ўрта вазн тоифаси вакиллари Роберт Уиттакер (22-5) ва Пауло Коста (13-1) иштирокидаги жанг 17 апрель куни бўлиб ўтадиган UFC Fight Night мусобақасининг асосий воқеаси бўлади, дея хабар қилмоқда BJ Penn.
30 ёшли Уиттакер ва 29 ёшли Коста иштирокидаги беш раундлик жанг камар учун кечмайди. Бу шундан далолат берадики, гарчи мазкур дивизион чемпиони Исраэл Адесаня (20-0) яримоғир вазн чемпиони Ян Блахович билан жанг қилиш арафасида турган бўлса-да, ҳеч қандай вақтинчалик ёки вакант камар учун жанг ўтказилмайди.
Аввалроқ бразилиялик яккакурашчининг жамоаси бу жанг чемпионлик камари учун кечиши кераклигини таклиф қилганди. Бироқ UFC буни рад этган кўринади.
Таъкидланишича, жангни ўтказиш учун асосий даъвогар Лас-Вегас (АҚШ) шаҳри бўлиб турибди.
Маълумот учун, Уиттакер UFC ўрта вазн тоифаси чемпионлик камари учун биринчи рақамли даъвогар ҳисобланади. Коста эса дивизион рейтингида иккинчи ўринда бормоқда. Бироқ уларнинг иккиси ҳам чемпион Адесаняга ютқазган.
Эслатиб ўтамиз, мазкур вазн тоифасида ўзбекистонлик яккакурашчи Маҳмуд Муродов (25-6) қатнашади. Муродов UFC 257 мусобақасида америкалик Эндрю Санчесни нокаутга учратди.
Маҳмуд Муродов ва Эндрю Санчес ўртасидаги жангни бу ерда томоша қилиш мумкин — видео.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)