«Мен ҳар доим ‘канонир’ бўлиб қоламан». Месут Ўзилнинг «Арсенал»даги хайрлашув мактуби

Лондоннинг «Арсенал» клубидаги узоқ йиллик фаолиятидан сўнг асли турк миллатига мансуб бўлган германиялик футболчи Месут Ўзил «тўпчилар» билан хайрлашди. Унинг кейинги манзили «Фенербаҳче» клуби бўлди. Ижтимоий тармоқларга алоҳида меҳр берадиган Ўзил клуб ва жамоа мухлисларига хайрлашув мактубини ёзмасдан кета олмасди. Ва шундай бўлди ҳам, у Instagram саҳифасида ҳаммаси учун барчага миннатдорчилик билдириб, ўзининг таъсирли дил изҳорларини билдирди. «Дарё» қуйида ўқувчилар учун ушбу хайрлашув мактубини ўзбек тилида ҳавола этади.

Азиз, «канонирлар». 7,5 йил. Тахминан, 3000 кун. Лондонда шунча вақт бўлганимдан кейин бу мактубни ёзиш бироз ғалати туюлмоқда. Мен бу ерга келганимдан бери ўзимни худди уйдагидек ҳис қилганман. Клубнинг барча ходимлари, жамоадошларим ва энг муҳими, ақл бовар қилмайдиган мухлислар мени очиқ кўнгил билан кутиб олган. 2013 йилнинг сентябрь ойида Арсен Венгернинг менга билдирган ишончидан доимо миннатдорман. Ҳар доим ўз уйим деб айта оладиган Шимолий Лондонда мен улғайдим. Буни ҳеч қачон унутмайман. Шу вақт давомида «Арсенал»да ўтказган вақтимда кўплаб парвоз ва муваффақиятсизликларни бошдан кечирдим. 250 дан ортиқ ўйин, 44 та гол ва 71 та голли узатма, аммо энди «Арсенал» билан йўлларимиз айро тушмоқда.

Биз биргаликда 9 йиллик танаффусдан кейин бунга муносиб бўлган мухлисларга узоқ кутилган совринларни тақдим этдик. Мен клуб ва мухлисларга бўлган муҳаббатимни сўз орқали ифодалашга қийналаман. Ахир қандай қилиб биргина хат билан 8 йиллик миннатдорчиликни тасвирлаш мумкин?! Анчадан бери ўйнамаганимга қарамай, жамоани ҳар бир ўйинда қўллаб-қувватлашда давом этаман. Мен бутун умр «канонир» бўлиб қоламан – бунга ҳеч қандай шубҳа йўқ. Ҳозир биз жамоани одатдагидан-да кўпроқ қўллаб-қувватлашимиз ва у учун туриб беришимиз зарурдир. Бу мавсум ҳар бир Премьер Лига жамоаси учун оғир кечмоқда, шунинг учун биз натижалардан қатъи назар ҳозирги таркиб ва персонални қўллаб-қувватлашимиз керак.

Hale End’дан («Арсенал» академияси) баъзи йигитларнинг асосий таркибга қўшилишларини кўриш жуда ёқимли бўлди. Барчамизга маълумки, улар бизнинг клубимизнинг келажаги ва уларга омад тилайман! «Эмирейтс»да исмим куйлаганини эшитганимдаги ҳиссиётларни ҳеч қачон эсимдан чиқармайман, жамоа либосини илк марта кийганимдаги хотиралар эса мен билан бутун умрга қолади».

«Арсенал»даги вақтим ҳақида жуда кўп ёзилди, айниқса, сўнгги ойларда. «Арсенал» – нуфузли ва юқори даражадаги клуб, мен буни ҳар сафар майдонга тушганимда ҳис қилардим. Футболчилар, ходимлар ва раҳбарият келиб, кетаверади, аммо клуб қадриятлари ва мухлислар абадийдир. Ҳурмат ва қадр-қиммат принциплари ҳеч қачон унутилмаслиги керак. Бу клубдаги ҳар бир инсоннинг масъулияти, улар ушбу қадриятлар учун иш олиб бораётганини эсдан чиқармаслиги керак. Юқорида айтганимдек, ўтган сўнгги бир неча ой осон бўлмади. Ҳар қандай футболчи сингари, мен ҳам жамоа учун ҳар дақиқада ўйнашни хоҳлардим. Аммо ҳаётда ҳамма нарса сиз хоҳлаган ёки кутгандек бўлмайди, аммо муҳими, ҳаётдан салбий эмас, балки ижобий нарсаларни излаш. Шунинг учун мен афсусланмасдан яшашга ҳаракат қиламан ва ҳеч кимга ҳеч қандай гина ушлаганим йўқ. «Арсенал» – шунчаки футболдан кўпроқдир. Майдонда ёрдам беришга ҳаракат қилганим каби, иложи борича Лондон жамоатчилигининг ҳам аъзоси бўлишга ҳаракат қилдим. Шимолий Лондон мени ўз лагерига қабул қилди ва ҳар бир янги мавсумда ушбу ажойиб жамоани хурсанд қилишга ҳаракат қилдим. Гарчи, Шимолий Лондонни тарк этган бўлсам-да, бу нарсалар тўхтамайди. Бу бир бобнинг тугашини англатади, холос. Аммо бу ажойиб клуб билан алоқам ҳеч қачон тугамайди. Мен хайрлашмайман, балки кўришгунча дейман. Бутун дунё бўйлаб «Арсенал» мухлисларига YaGunnersYa дейман.

Месут Ўзил, футболчи

Месут лондонликлар жамоасида 2020 йилнинг март ойидан бери ўйин амалиётисиз қолаётганди. «Арсенал» уни 2020/21 йилги мавсумда АПЛ ва Чемпионлар Лигаси қайдномасига киритмаганди. Унинг «канонирлар» билан шартномаси 2021 йилнинг ёзига қадар мўлжалланганди.