Профессионал бокснинг енгил вазн тоифасида ҳаракат қилаётган Райан Гарсия (20-0, 17 КО) ўзининг навбатдаги жангини яримўрта вазн тоифасида WBA Super камари соҳиби Мэнни Пакьяога (62-7-2, 39 КО) қарши ўтказишини эълон қилди.
«Менинг орзум ҳақиқатга айланди. Пакяо билан рингни бўлишиш мен учун шараф. Мен ҳар доим сени рингда ва ундан ташқарида қилган ишларинг учун ҳурмат қиламан. Кучли рингда ғалаба қозонсин», — дея ёзди Райан Гарсия.
ESPN нашрининг хабар қилишича, 42 ёшли филиппинлик боксчи ва 22 ёшли америкалик спортчи ўртасидаги жанг сентябрь ойида бўлиб ўтади. Жангни қаерда ўтказиш борасида иккита вариант бор — Лос-Анжелес (АҚШ) ва Саудия Арабистони.
Айни дамда музокаралар бошланғич паллада бўлиб турибди. Томонлар бу тўқнашувга қадар бир мартадан бошқа жангларда рингга кўтарилиш вариантини ҳам кўриб чиқмоқда. Шунингдек, жанг қайси вазн тоифасида бўлиши ҳам номаълум. Ҳозирча ҳеч қандай келишувга эришилмаган.
Америкалик журналист Стив Кимга кўра, бу кўргазмали жанг бўлади.
Мавзуга доир: Мэнни Пакьяо Филиппинда партия етакчисига айланди. У 2022 йилда президентликка ўз номзодини қўймоқчи
Пакяо сўнгги бор 2019 йилнинг июнь ойида рингга кўтарилган ва унда Кит Турманни мағлуб этганди. Гарсия эса 2021 йилнинг 3 январида Люк Кемпбелни таслим этиб, WBC’нинг вақтинчалик чемпиони мақомини қўлга киритди.
Маълумот учун, Мэнни Пакьяо проф боксдаги илк жангини 1995 йилда ўтказган. Орадан 3 йил ўтиб эса Райан Гарсия туғилган.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)