«Челси» — ўз тизимининг асири. Фрэнк Лэмпардга имконият берилмагани ҳақида

«Челси»даги футболчилик фаолияти давомида Фрэнк Лэмпард мураббийларнинг истеъфосини етарли даражада кўп маротаба кўрган. Клуб хўжайини Роман Абрамович мураббийлар билан муддатидан олдин хайрлашиш учун нақ 110 миллион фунт сарфлаган. Луис Фелипе Сколарига тайинланганидан етти ой ўтмай чиқиш эшиклари кўрсатилган бўлса, Андре Виллаш-Боаш «янги Моуриньо» сифатида келиб, атиги 256 кундан сўнг клуб билан хайрлашганди. Роберто ди Маттео эса клуб учун орзиқиб кутилган Чемпионлар Лигасида ғолиб чиқишнинг уддасидан чиққанди, бироқ олти ойдан сўнг у ҳам нарсаларини йиғиб, жамоа билан хайрлашди.

Айни пайтда ҳам шу ҳолат такрорланмоқда. АПЛнинг сўнгги 8 та ўйинида «Челси» бор-йўғи «Вест Ҳэм» ва «Фулҳэм» устидан ғалабага эришди, бу эса ўз навбатида инқирозга ўхшайди. Аммо мураббийни шундай лаҳзада ишдан бўшатиш бошлиқларнинг очкўз эканлигини яна бир бор исботлади: Лэмпард биринчи жиддий тўсиқдаёқ ҳайдалди, бунга асосий сабаблардан бири Чемпионлар Лигасидан қуруқ қолиш эҳтимолидир.

Фрэнк аввал ҳам буларнинг барчасини бошдан кечирган. 2014 йилда клубнинг энг яхши тўпурари билан шартнома имзоланмади, аммо Лэмпард сустлашмади ва «Манчестер Сити» билан ҳамкорликка киришди. Шу сабабли «Челси»га мураббий сифатида қайтгач, Лэмпард ўз номи ва афсонавий ўтмиши унга аввалгилардан кўра кўпроқ «ҳаёт» бермаслигини тушунарди. Бу Сульшернинг барқарор иш олиб боришини кутишга тайёр бўлган «Манчестер Юнайтед» эмас.

«Манчестер Юнайтед» маълум муддат сабр қилди ва ҳозирда жадвалнинг энг юқори қисмида бормоқда, бироқ «Челси» ҳамма нарсанинг ҳозир ва шу ерда бўлишини хоҳлайди. «Кўклар» муаммога дуч кела бошласа, ҳеч ким мураббийнинг истиқболи ва салоҳияти билан қизиқиб ўтирмайди, ҳатто гап Лэмпард сингари одам ҳақида кетса ҳам. Натижада жамоада ҳар қандай мутахассисни ўз домига тортиб кетадиган гирдоб пайдо бўлади.

Фрэнкнинг мураббийлик фаолияти учун бундай ўзгариш яхши томондан таъсир қилиши мумкин. Боиси ҳозирги «Челси»да у ҳеч қачон жараённи тўлиқ бошқаролмас эди. Лондон клубида мураббийнинг фикри ҳал қилувчи аҳамиятга эга эмас: у фақат футболчиларни руҳлантириши ва уларга омад тилаши мумкин. The Athletic хабарига кўра, 2020 йилнинг ёзида амалга оширилган олтита трансфердан Лэмпард фақат Бен Чиллуэлни («Лестер») хоҳлаган экан.

Сўнгги вақтларда мухлислар ва журналистлар Фрэнкни танқид остига ола бошлади: клуб 250 миллион фунт сарфлади, аммо ҳеч қандай натижа йўқ. Агар «Бёрнли»дан Жеймс Тарковски ва «Вест Ҳэм»дан Деклан Райс «Челси»га келганида эди, Лэмпардга эътироз билдирса бўларди. Чунки ёш мутахассис айнан ушбу футболчиларни жамоада кўришни истаганди. Аммо жамоа раҳбариятининг бошқа режалари бўлган.

2020/2021 йилги мавсум бошланишидан олдин Лэмпард раҳбариятни чемпионлик учун курашга умид қилмаслик ҳақида огоҳлантирганди. Ахир, қимматбаҳо харидларга жой ажратиш учун асосий таркибнинг ярмини ўзгартириш лозим эди. Маълумки, ҳеч бир мураббий тезда бундай вазифани уддалай олмайди. Янги келган олти нафар футболчидан бештаси умуман бошқа чемпионатлардан келгани ҳисобга олинса эса, вазият яна-да мураккаброқдек кўринади.

Шуни унутмаслик керакки, Лэмпард клубга трансфер тақиқи қўйилган вақтда таклиф қилинганди. Ҳеч қандай кучайтиришларсиз у жамоани биринчи мавсумдаёқ Чемпионлар Лигасига олиб чиқа олди. Фрэнк таркибга кўплаб клуб тарбияланувчиларини жалб қилиб борди ва натижага миллионлаб долларлик сармояларсиз ҳам эришиш мумкинлигини исботлади. «Челси» пулга тўла қоп мақомидан абадий қутулиши ҳам мумкин эди, аммо трансфер тақиқи олиб ташланиши биланоқ ҳаммаси ўз жойига қайтди.

Эҳтимол, Лэмпард янги келганларга қандай ёндашиш кераклигини топган бўларди ҳам, аммо «Челси» ҳар доимгидек кутишни истамади. Ҳаверц ҳам, Вернер ҳам ҳали ёш, уларга вақт керак. «Сиз бизнинг ёш футболчилардан мутлақо барқарор бўлишни талаб қила олмайсиз. Улар ҳали шу даражагача ўсади, аммо ҳозирча ишлаш керак», – деганди Фрэнк жамоани ҳимоя қилган ҳолда.

Лэмпарддан иккинчи марта қадрдон клубидан кетиш сўралди, аммо бу уни синдира олмайди. Фрэнк ёшлар билан ишлай олишини ва ҳар қандай даражадаги клубни бошқаришга қодирлигини намойиш этиб улгурди. Бир кун келиб у том маънодаги мураббийлик эркинлигини қўлга киритади ва аслида нималарга қодир эканлигини кўрсатиб беради. Ўша пайтгача эса «Челси» яна кўплаб мураббийларни алмаштирган бўлади – боиси улар бошқача ишлашни билмайди.