So‘nggi yillarda Italiya futboli asta-sekin avvalgi darajasini tiklab bormoqda. Ayniqsa, Milan klublarining yetakchiligi va bosh sovrindan tobora uzoqlashayotgan “Yuventus”ning ishtiroki bilan yodda qolayotgan A Seriyaning 2020/21-yilgi mavsumi anchagina qizg‘in ko‘rinish olmoqda. Italiya futboli turli davrlarni boshdan kechirdi, ammo maktab va akademiyalar yetuk futbolchilarni yetishtirishdan to‘xtagani yo‘q. Ularning ko‘plari allaqachon yulduzga aylangan yoki bu maqomga juda yaqin turibdi. Demak, quyida Italiyaning ayni paytdagi eng qimmat futbolchilari haqida fikr yuritiladi.

Andrea Belotti

Klubi: “Torino”

Transfer narxi: 40 million yevro

Foto: La Stampa

Belotti Italiya futbolining bir nechta akademiyalarida tahsil olishga ulgurgan. 2015-yilda “Torino” uni “Palermo” yoshlar jamoasidan sotib oladi. Bu vaqt ichida hujumchi o‘ziga sarflangan 8,4 million yevroni to‘liq oqladi. U “buqalar” safida o‘tkazgan besh mavsumining to‘rttasida jamoaning eng yaxshi to‘purariga aylangan. Shu bilan birga Belotti Turin klubi bilan hali hech qanday sovringa ega chiqmagan. Payqash mumkinki, 27 yoshli forvard bir necha yil davomida “Torino” darajasidan oshib ketdi. Har yili boshqa shahar va mamlakat jamoalari futbolchining xizmatlariga qiziqish bildiradi, ammo Belottiga “buqalar” safini tark etish nasib etmayapti.

Chiro Immobile

Klubi: “Latsio”

Transfer narxi: 45 million yevro

Foto: Twitter

Chiro anchagina murakkab bo‘lgan futbol hayotini boshidan kechirgan. Immobile ham vatani, ham uning tashqarisida bir qancha klublarda o‘ynagan va faqat “Latsio”dagina qo‘nim topgan. Forvard biroz kech, 30 yoshga yaqin ochildi. Ammo hechdan ko‘ra kech deganlaridek, afsuslanishga hojat yo‘q. 2019/20-yilgi mavsum italiyalik uchun faoliyatidagi eng omadlisi bo‘ladi. U A Seriyaning eng yaxshi to‘purari deb topildi. “Oltin butsa”ni qo‘lga kiritdi va “burgutlar”ning 12 yil ichida ilk marta Chempionlar Ligasi guruh bosqichiga yo‘l olishida yordam berdi. Katta ehtimol bilan Chiro 5 yillardan so‘ng aynan Rim klubida faoliyatini yakunlasa kerak.

Nikolo Zaniolo

Klubi: “Roma”

Transfer narxi: 45 million yevro

Foto: FootBoom

Zaniolo – Italiyaning eng yaxshi yosh futbolchilaridan biri hisoblanadi. Nikolo yoshligida “Jenoa”, “Fiorentina” akademiyalari va “Inter”ning yoshlar jamoasida to‘p tepgan. 2018-yil iyul oyidan buyon 21 yoshli hujumkor yarim himoyachi “Roma”da o‘ynamoqda. Zaniologa Rim va, umuman, Italiyada katta umidlar bog‘langan. Ammo yigitchaning porloq kelajagi xavf ostida qolmoqda. Bir yil ichida futbolchi har ikkala tizzasidan jiddiy jarohat (tizzaning tutashgan suyaklari yorilishi) oldi. To‘g‘ri, italiyalik hali yosh, ammo bu kabi jiddiy jarohatlar iz qoldirmay qo‘ymaydi.

Lorenso Insinye

Klubi: “Napoli”

Transfer narxi: 48 million yevro

Foto: Sportbox

Insinye “Napoli” akademiyasi bituvchisi sanaladi. U mana 8 yildirki, qadrdon jamoasi sharafini himoya qilib kelmoqda va hatto sardorlik bog‘ichigacha yetib keldi. 29 yoshli Lorenso neapolliklar bilan birga unchalik ko‘p sovrin qo‘lga kiritmagan – 2 bor Italiya Kubogi va bir marta mamlakat Superkubogida zafar quchgan. Ammo u klub lagerida hurmatga sazovor shaxs hisoblanadi va jamoa muxlislari uni Maradonaning merosxo‘ri deb ataydi. Lorensoning keyingi faoliyati qanday kechmasin, u Neapolda doimo obro‘li inson bo‘lib qolaveradi.

Federiko Kyeza

Klubi: “Yuventus” (ijarada)

Transfer narxi: 48 million yevro

Foto: Twitter

“Fiorentina” tarbiyalanuvchisi o‘z vaqtida klubini tark etib, “Yuventus”ga ikki yillik ijaraga o‘tdi. “Binafsharanglar” nursiz o‘yin ko‘rsatayotgan bir vaqtda Kyeza o‘zining nimalarga qodir ekanligini ko‘rsatmoqda. 2020/21-yilgi mavsumda 23 yoshli vinger “keksa sinyora”ga bir nechta o‘yinlarda g‘alaba keltirdi va shu bilan Andrea Pirloni ayovsiz tanqidlardan qutqarib qoldi. Shuningdek, Federiko hozirga qadar Italiya terma jamoasi safida ham 21 ta o‘yin o‘tkazib, 1 ta gol urishga muvaffaq bo‘ldi. Turinliklar Kyezani sotib olishga harakat qilib ko‘rishi aniq, ammo bu arzonga tushmasligi aniq. “Fiorentina” prezidenti Rokko Komisso o‘z futbolchilarini qadrlashni biladi. Ehtimol, shuning uchun ham u A Seriya klublari egalari orasida eng boyi bo‘lsa kerak.

Jorjinyo

Klubi: “Chelsi”

Transfer narxi: 50 million yevro

Foto: Twitter

Jorjinyo – Mauritsio Sarrining sevimli futbolchilaridan biri hisoblanadi. Mutaxassis “Chelsi” boshqaruviga kelgach, “Napoli”da 3 yil shug‘ullantirgan vatandoshini jamoaga olib keladi. “Yuventus”da ish boshlaganidan so‘ng ham Sarri yana Jorjinyoni o‘z jamoasiga jalb qilishga urindi, ammo bu safar hech narsa o‘xshamadi. Shundan keyin bir muncha vaqt futbolchining “ko‘klar” lageridagi taqdiri so‘roq ostida qoldi. Ammo hozir 29 yoshli yarim himoyachi Londonda o‘zining uchinchi mavsumini o‘tkazmoqda. Bu vaqt ichida u jamoa bilan birga Yevropa Ligasida g‘alaba qozonishga muvaffaq bo‘ldi (Sarri boshchiligida). Sarri “Yuventus”dan bo‘shatilganidan so‘ng esa Jorjinyoning atrofidagi mish-mishlar ham to‘xtadi.

Alessandro Bastoni

Klubi: “Inter”

Transfer narxi: 50 million yevro

Foto: Twitter

Bastoni “Inter”da 2017-yilning avgustidan beri o‘ynab keladi. “Neradzurri” yosh himoyachini “Atalanta”dan 31 million yevroga sotib oladi. Avvaliga futbolchi qator klublarda ijara asosida sayohat qilishga majbur bo‘ldi, ammo hozir u Milan klubining barqaror o‘yinchisiga aylangan. 21 yoshli markaziy himoyachiga boshqa klublar, jumladan, “Manchester Siti” ham qiziqish bildira boshladi. Ushbu qiziqishlar fonida “Inter” tezda italiyalik uchun yangi shartnoma taklif qildi va yaqin orada uning imzolanishi kutilmoqda. Antonio Kontening jamoasida asosiy himoyachi bo‘lish – jiddiy maqom bo‘lib, bundan voz kechish unchalik oson emas.

Nikolo Barella

Klubi: “Inter”

Transfer narxi: 55 million yevro

Foto: Twitter

Barella – qat’iyat va o‘z ustida tinmay ishlashning yorqin namunasidir. Afsuski, yosh futbolchilar orasida bundaylarning soni unchalik ham ko‘p emas. Nikolo yoshligidan “Inter”da o‘ynashni orzu qilib kelgan, futbolchida bunday imkoniyat 2019-yilning iyulida paydo bo‘ladi. O‘shanda “neradzurri” uni “Kalyari”dan 1 mavsumga ijaraga olgandi. Barella Kontedek injiq va takabbur murabbiyni shu daraja hayratda qoldirdiki, “qora-ko‘klar” italiyalikning transferiga 28 million yevro sarflashdi. “Inter” 23 yoshli yarim himoyachiga katta umidlar bog‘lagan, ayniqsa, Kristian Eriksenning omadsiz transferidan so‘ng. Nikolo esa milanliklar unga bejiz ishonmaganini har bir uchrashuvda isbotlab keladi.

Marko Verratti

Klubi: PSJ

Transfer narxi: 60 million yevro

Foto: Bleacher Report

Verratti Italiyada faqat o‘zi tarbiyalanuvchisi bo‘lgan “Peskara”da o‘ynagan, xolos. 2012-yil iyul oyida PSJ futbolchini 12 million yevroga sotib oladi.O‘shandan beri Marko parijliklar safida to‘p surib keladi. 2019-yil yozida Italiya klublari futbolchiga qiziqish bildirdi. Ammo u Fransiya poytaxtida qolishga qaror qildi va Liga 1 chempioni bilan shartnomasini 2024-yilning iyunigacha uzaytirdi. Parijda 28 yoshli yarim himoyachini hamma narsa qoniqtiradi. PSJda o‘tkazgan 8 mavsum davomida Verratti bir necha bor Fransiyada yutish mumkin bo‘lgan barcha sovrinlarni qo‘lga kiritdi. Ammo Chempionlar Ligasi hamon Veratti bilan birgalikda butun Parij uchun orzu bo‘lib qolmoqda.

Janluiji Donnarumma

Klubi: “Milan”

Transfer narxi: 60 million yevro

Foto: Twitter

Qizig‘i shundaki, hozirda eng qimmat italiyalik ikki futbolchidan biri bu darvozabondir. Bundan tashqari Donnarumma Yevropaning kamida eng yaxshi besh nafar darvozabonidan biri hisoblanadi. Zlatan Ibragimovich va Roberto Manchini esa uni dunyoning eng yaxshi darvozaboni deb biladi. Buffonning adashi atigi 21 yoshda bo‘lishiga qaramay, allaqachon milanliklarning asosiy darvozaboni sifatida o‘zining oltinchi mavsumida qatnashmoqda va 80 ta bahsda o‘z darvozasi daxlsizligini saqlab qolgan. Biroq klub rahbariyati hozirda u bilan shartnomani uzaytirish jarayonini nima sababdan kechiktirayotgani tushunarsiz. Yozda Donnarumma erkin agentga aylanadi, bunday futbolchini tekinga yo‘qotish esa katta ahmoqlik bilan barobar. Tomonlarda barcha jihatlarni kelishib olish va birgalikda Chempionlar Ligasiga qadam qo‘yish uchun bir necha oy bor, xolos.

Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!