“Chelsi” bosh murabbiyi Frenk Lempard o‘z lavozimidan ozod etildi. Londonliklar 42 yoshli mutaxassis iste’fosini ma’lum qildi.
Jamoaning so‘nggi vaqtlardagi natijalari va o‘yin saviyasining kutilganidek bo‘lmayotgani bunga sabab qilib ko‘rsatilgan.
Lempard londonliklar boshqaruviga 2019-yilning yozida kelgandi. 2019/20-yilgi mavsumda jamoa Premyer Ligada 4-o‘rinni qo‘lga kiritdi. Chempionlar Ligasida esa 1/8 finalda “Bavariya”ga yutqazdi (0:3, 1:4).
“Chelsi” Premyer Liga 2020/21-yilgi mavsumining so‘nggi besh o‘yinida bitta g‘alaba qayd etdi. Jamoa 19-turdan keyin 29 ochko bilan 9-o‘rinda bormoqda. Chempionlar Ligasining joriy mavsumida esa “Chelsi” guruhni birinchi o‘rinda yakunladi va 1/8 finalda “Atletiko” bilan o‘ynaydi.
The Athletic’ning xabar qilishicha, “Chelsi”ning yangi bosh murabbiyi Tomas Tuxel bo‘ladi.Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
