Сўнгги вақтларда Лионель Мессининг кайфияти ёмонлиги ва «Барселона»нинг инқирозлар гирдобига тушиб қолгани ҳақида кўп гапирилмоқда. Табиийки, бу аргентиналик даҳо мухлисларининг жонига тегишга улгурди. Шундай экан, биз қуйида уларни бироз чалғитишга ҳаракат қилган ҳолда Мессининг ҳашаматли ҳаёти ҳақида ҳикоя қилиб берамиз.
Месси қаерда яшайди?
Уйнинг тахминий қиймати (таъмирлаш ишлари билан) – 6 миллион еврони ташкил қилади. Месси Барселона яқинида жойлашган Кастелдефелс шаҳарчасида яшайди. Маълумотларга кўра Месси ушбу уйни сотиб олган вақтида жуда шовқинли қўшниларига дуч келган. Натижада у тинч яшаш учун уларнинг уйларини ҳам сотиб олишга мажбур бўлган.
Мессини ҳашаматли уйини ўзига ёққан ранглар билан безатган. Лео оч ва ёрқин рангларни афзал кўради. Уйда спорт зали, чўмилиш ҳавзаси, футбол майдони ва ажойиб боғ бор.
Машиналар, яхта ва шахсий самолётлар
Замонамизнинг энг яхши футболчиларидан бирининг автопаркига ҳам ҳавас қилса арзийди. Бугунги кунга келиб, унинг гаражидан 15 га яқин автомобиль ўрин олган. Улар орасида Ferrari F430 Spider, Range Rover Vogue, Audi Q7, Cadillac Escalade, Audi R8 GT каби жаҳонга машҳур машиналарни учратиш мумкин. Автопаркнинг тахминий қиймати 38 миллион долларга баҳоланган.
«Барселона» ҳужумчиси 2016 йилда дунёдаги энг қиммат Ferrari эгасига айланганди. Месси ушбу машина учун нақ 34,5 миллион доллар тўлаган.
Мессининг «тойчоқлари» ҳақида тўлиқ маълумотни бу ердан олишингиз мумкин:
Ғилдираклардаги ҳашамат ёхуд Лионель Месси қандай машиналарда юради?
Шунингдек, Леонинг ихтиёрида 10 миллион фунтлик яхта ва иккита шахсий самолёт (Embraer Legacy 650 – 28,3 миллион евро, Gulfstream V – 13 миллион евро) бор. Соатига 25 км/тезликда ҳаракатлана оладиган яхтада Месси Ибица оролида ҳордиқ чиқарса, барча шароитларга эга бўлган самолётларда ватани Аргентинага учади.
Шахсий ҳаёт
2017 йилда Лео ёшлигидан таниш бўлган Антонелла Рокуццо исмли қизга уйланган. Жуфтлик ҳозирда 3 нафар ўғил фарзандни вояга етказмоқда. Оиласини яхши кўрадиган футболчи ижтимоий тармоқлардаги саҳифаларига тез-тез фарзандлари ва рафиқаси билан тушган расмларни жойлаб туради.
Дўстлари ким?
Мессини бутун дунё бўйлаб миллионлаб инсонлар яхши кўради, бироқ Лео фақатгина саноқлилар билангина муносабат қуриши мумкин. Унинг яқин дўстлари орасида «Барселона» собиқ футболчилари Луис Суарес, Сеск Фабрегас ва Дани Алвесни учратиш мумкин.
Унинг энг ишонган дўсти эса «Манчестер Сити» ҳужумчиси Серхио Агуэро. Ҳужумчилар Аргентинанинг турли ёш тоифасидаги терма жамоаларда бирга ҳаракат қилган. Терма жамоа йиғинларида эса улар ҳар доим бирга вақт ўтказади.
Футболдан ташқари қизиқишлар
Футболдан бўш вақтларини Месси оила ва дўстлар даврасида ўтказишни яхши кўради. У миллионлар ўйинидан бошқа спорт турини тан олмайди.
Бундан ташқари Месси бўш вақтларида мунтазам равишда реклама роликларида суратга тушади. Машҳур брендлар билан имзоланган шартномалар ва шахсий бизнеслар ҳақида эса яхшиси гапирмаган маъқул. Боиси Forbes унинг 2020 йилдаги даромадини 126 миллион долларга баҳолади. Бу эса уни дунёнинг энг кўп даромад топадиган футболчига айлантирди. Таққослаш учун унинг азалий рақиби Криштиану Роналдуда бу кўрсаткич 117 миллион долларга тенг.
Изоҳ (0)