«Дарё»га Самарқанд вилоятининг Каттақўрғон тумани Валижон қишлоғида яшовчи Олимжон Ғаниев ва унинг турмуш ўртоғи Комила Ғаниева мурожаат қилиб, 2020 йилнинг 30 ноябридан 1 декабрига ўтар кечаси куёви молхонасига ўт қўйиб юборганини, орадан шунча вақт ўтган бўлса-да, ҳуқуқни муҳофаза қилувчи органлар томонидан ҳеч қандай қонуний чора кўрилмаётганини билдирди.
«Дарё» мухбири Фарҳод Норбўтаев мурожаатни ўрганди.
«2020 йилнинг 29 ноябрь куни қизимнинг уйида можаро бўлган. Куёвим қизимни урган, уйидаги тикув машиналарини синдириб ташлаган. Зўрлаб, иккита қизи билан енгил кийимда кўчага чиқариб юборган. Кейин қайнонаси қизимни кўриб, бошқа уйга олиб кирган. Аммо куёвим тонг отаётганда у ердан ҳам чиқариб юборган, — дейди Комила Ғаниева. — Ўзим мактабда фаррош бўлиб ишлайман. Мактабдаги ҳамкасбларим қизим ва иккита неварам енгил кийимда кўчада йиғлаб юрганини айтишди. Бориб кўрсам, ҳақиқатда қизим кўчада йиғлаб юрган экан. Мени кўрган қизим гапиролмай йиғлади. Кейин билсам, куёвим ‘Уйингга борсанг уйингни ёқаман, ота-онангни ўлдираман’ деб қўрқитиб, мажбуран яшатар экан».
Комила Ғаниеванинг таъкидлашича, у 30 ноябрь куни қизи ва невараларини уйга олиб келган. Кейин куёви уйга келиб, дўқ-пўписа қилиб, уйини ёқиб кетиш билан таҳдид қилган. Шунда ҳам қизининг уйига қайтишига йўл қўймаган.
«2020 йилнинг 30 ноябрь куни бир неча бор участка нозирини чақирдик. Куёвимни қандай характерда эканлиги, унга бир чора кўришини, унинг дўқ-пўписаларидан қўрқаётганлигимизни билдирдик. Аммо участка нозири ўн минутда бораман, ярим соатда бораман, деб келмади. Кейин туман Ички ишлар бўлимига қўнғироқ қилиб, участка нозири келмаётганлиги, бошқа бирор одам юборишини сўрадик. Аммо туман ИИБдан ҳам бирор одам келмади. Қизим азоб чеккани учун шу кеча уйимизда қолишини айтдик, — дейди Комила Ғаниева. — Аммо ўша куни, яъни 30 ноябрдан 1 декабрга ўтар кечаси соат 23:30 да куёвим молхонамизга ўт ёқиб юборган. Тўғри, айнан куёвим ёқиб юборганини кўрмадик. Аммо у очиқчасига бизга уйимизга ўт қўйиб юбориш билан таҳдид қилганди. Қолаверса, бизга шу вақтгача ҳеч ким зиён етказмаган эди».
Комила Ғаниеванинг маълум қилишича, куёви беш йил мобайнида уларни ва қизини уриб, уйидаги идишларини синдириб, ҳақоратлаб келган. Айрим ҳолларда профилактика инспектори келиб, куёвини олиб кетган. Бундай ҳолат 5 йил давомида шу тарзда давом этган.
«Бизлар ИИБга ҳам прокуратурага ҳам айтдик. Самарқанд вилоятининг прокурорлари ҳам билади буни. Ҳатто порталга ҳам чиқдик. Аммо ҳеч қандай натижа бўлмаяпти. Туман прокурори келиб, қурувчилар иш бошлашини айтди. Аммо кейинчалик ёнғин содир бўлган жойнинг тупроғини ўзимиз чиқаришимизни, шундан сўнг қурувчилар иш бошлашини турмуш ўртоғимга айтиб кетган, — дейди Комила Ғаниева. — Мен буни чиқара олмасам, кимга чиқартираман. Бу ерда озмунча нарса борми? Ўзим 27 йилдан буён мактабда фаррош бўлиб ишлайман. 600 минг ойлик оламан. Бу ерда бизлар ҳар йили 130 килограммгача пилла етиштирардик. Маҳалла раисига ҳам айтдим. Маҳалла ҳам кимни олиб борсам экан, билмасам дейди. Маҳалла раисини чақирсам, мажлисим бор деб айтади. Мурожаат қиладиган одамим қолмади, тўғриси. Хўжайинимнинг қўлларини станок олиб кетган — ногиронлиги бор. Куёвимга нисбатан ҳеч қандай чора кўрилгани йўқ».
Маълум бўлишича, Комила Ғаниева ва унинг қизига Каттақўрғон туман Ички ишлар бўлимида ишловчи Дилноза Бекназарова ёрдам берган. У киши набирасини боғчага жойлаб, қизига иш топиб беришини айтган. Шунингдек, «бола пули» чиқариб беришда ҳам кўмаклашишини билдирган. Фақат Дилноза Бекназарова аёл ва унинг қизига жон куйдирган.
«Куёвим ҳар куни ичади, ичмаган куни йўқ. Ўтиним ҳам ёниб кетди. Йиғлай-йиғлай мана шу ўтинни олиб келиб берди. Воқеа бўлганига анча бўлди. Молим қўшнимизникида турибди. Эртага олиб чиқ, деса қаерга қўяман. Қийналиб кетдим. Мурожаат қилмаган одамим қолмади, тўғриси. Бизларни ё камбағал дейдими? Тўғри, улар пулдор одамлар эди. Балки, пул ўйнаётгандир. Менинг берадиган пулим йўқ, тўғриси, — дейди Комила Ғаниева. — Сизларга мурожаат қилишимдан мақсад молхонамни тикка қилиб, куёвимга қонуний чора кўришса деяпман. Беш йилдан буён қизимга азоб бериб келган куёвимнинг 3 гектар ери бор. Кунлар исигандан қизим ўша ерга кетади боласи билан. Куёвим ичкиликка ружу қўйган. Ичиб келаркан-да, сен ҳам ичасан, деб қизимни мажбурлар экан. Ичмаса, бошидан қуяркан, ураркан. Бизлар ойлаб кўрмаймиз қизимизни. Бундан икки йил аввал уч ойлик боласи қорнида пайти мажбурлаб ‘уксус’ ичирган: боласи тушиб қолган. Ураркан, ҳушидан кетиб қоларкан, ўзлари тез ёрдам чақириб ўзига келтириб оларкан. Бизларга бу нарсаларни билдирмайди ҳам. Ана шундай азоблар бериб келган экан қизимга. Қизимни икки нафар қизчаси бор. Иккинчи қизи туғилганда ҳам туғриқхонадан келганда кечқурун сен яна қиз олиб келдинг,деб уриб-уриб кўчага чиқариб юборибди. Йиғлаб қишлоғимиз қабристони олдига келганда сочидан бураб, яна уйига қайтариб олиб кетибди».
Самарқанд вилоят ИИБ ахборот хизмати Комила Ғаниеванинг мурожаати бўйича қуйидагиларни маълум қилди.
«Каттақўрғон туман Валижон қишлоғида яшовчи фуқаро 1970 йилда туғилган Комила Ғаниева ўз мурожаатида 1991 йилда туғилган қизи Ирода Абдурасулова ҳамда куёви 1993 йилда туғилган Маъруф Нурмаматовнинг ўрталарида йиллар давомида ўзаро келишмовчилик бўлиб келганлиги оқибатида М.Нурмаматов турмуш ўртоғи И.Абдурасуловага ҳам жисмонан ҳам руҳан тазйиқ ўтказганини маълум қилган. 2020 йилнинг 29 ноябрь куни бўлиб ўтган жанжалдан кейин И.Абдурасулова ота-онасининг уйига кетган ва шундан кейин 1 декабрь куни яшаш уйини молхонасини ёқиб юборгани маълум қилган».
Каттақўрғон туман ИИБ 13-сон ИИБ ходимлари томонидан текширув ишлари олиб борилиб, ҳолат юзасидан тегишли тартибда ҳужжатлар расмийлаштирилган. Фуқаро Маъруф Нурмаматов ва Ирода Абдурасуловага нисбатан Маъмурий жавобгарлик тўғрисидаги кодекснинг 41-моддаси (ҳақорат қилиш) ва 52-моддаси 2-қисми (енгил тан жароҳати етказиш)га асосан ҳужжатлар расмийлаштирилиб, қонуний қарор қабул қилиш учун тўпланган ҳужжатлар Каттақўрғон туман маъмурий судига юборилган.
Бундан ташқари, руҳий ва жисмоний тазйиқ ўтказганлиги юзасидан туман маҳалла ва оилани қўллаб-қувватлаш бўлими бошлиғининг биринчи ўринбосари Л.Убайдуллаева, туман ИИБ ҲПБ ХКМБ катта инспектори, катта лейтенант Д.Бекназарова томонидан ҳар иккала томон билан профилактик суҳбат ўтказилиб, И.Абдурасуловага ҳимоя ордери берилган.
Ҳозирда аниқланган ҳолатлар юзасидан тегишли тартибда ҳужжатлар расмийлаштирилиб, фуқаро Комила Ғаниеванинг мурожаати Каттақўрғон туман ИИБ 13-сон ИИБ томонидан терговга қадар текширув ҳаракатлари олиб борилмоқда.
Изоҳ (0)