UFC 257. Маҳмуд Муродовнинг жанги вақти билан боғлиқ ўзгариш юз берди

Абу-Дабида (БАА) бўлиб ўтадиган UFC 257 мусобақасида иккита жанг бекор қилинди.

Россиялик яккакурашчи Арман Сарукян прелим кардда Нусрат Ҳақпараст билан жанг қилиши керак эди. Бироқ Сарукянинг рақиби соғлиғидаги муаммолар туфайли вазн ўлчаш маросимига кела олмади ва улар ўртасидаги жанг бекор қилинди.

Асосий карддан ўрин олган Мэтт Фривола ва Оттман Азайтар ўртасидаги беллашув эса марокашлик жангчининг коронавирус билан боғлиқ қоидаларни бузганлиги сабаб UFC’дан четлатилиши туфайли бекор бўлди.

UFC бу вазиятдан чиқишнинг ўзига хос йўлини топди. Ҳар икки беллашув енгил вазн тоифаси вакиллари ўртасида бўлгани боис, рақибсиз қолган Сарукян ва Фривола ўзаро жанг қиладиган бўлди. Уларнинг жанги прелим карддан ўрин олди.

Бу воқеалар туфайли UFC 257 мусобақаси доирасидаги Маҳмуд Муродов ва Эндрю Санччес ўртасидаги жанг асосий кардга кўчирилди. Мусобақа Тошкент вақти билан 24 январь тонгги соат 05:00 да бошланади. Асосий кард жанглари эса 08:00 да бошланиши кутилмоқда.