Сўнгги йилларда Италия футболи аста-секин аввалги даражасини тиклаб бормоқда. Айниқса, Милан клубларининг етакчилиги ва бош совриндан тобора узоқлашаётган «Ювентус»нинг иштироки билан ёдда қолаётган А Сериянинг 2020/21 йилги мавсуми анчагина қизғин кўриниш олмоқда. Италия футболи турли даврларни бошдан кечирди, аммо мактаб ва академиялар етук футболчиларни етиштиришдан тўхтагани йўқ. Уларнинг кўплари аллақачон юлдузга айланган ёки бу мақомга жуда яқин турибди. Демак, қуйида Италиянинг айни пайтдаги энг қиммат футболчилари ҳақида фикр юритилади.
Андреа Белотти
Клуби: «Торино»
Трансфер нархи: 40 миллион евро
Белотти Италия футболининг бир нечта академияларида таҳсил олишга улгурган. 2015 йилда «Торино» уни «Палермо» ёшлар жамоасидан сотиб олади. Бу вақт ичида ҳужумчи ўзига сарфланган 8,4 миллион еврони тўлиқ оқлади. У «буқалар» сафида ўтказган беш мавсумининг тўрттасида жамоанинг энг яхши тўпурарига айланган. Шу билан бирга Белотти Турин клуби билан ҳали ҳеч қандай совринга эга чиқмаган. Пайқаш мумкинки, 27 ёшли форвард бир неча йил давомида «Торино» даражасидан ошиб кетди. Ҳар йили бошқа шаҳар ва мамлакат жамоалари футболчининг хизматларига қизиқиш билдиради, аммо Белоттига «буқалар» сафини тарк этиш насиб этмаяпти.
Чиро Иммобиле
Клуби: «Лацио»
Трансфер нархи: 45 миллион евро
Чиро анчагина мураккаб бўлган футбол ҳаётини бошидан кечирган. Иммобиле ҳам ватани, ҳам унинг ташқарисида бир қанча клубларда ўйнаган ва фақат «Лацио»дагина қўним топган. Форвард бироз кеч, 30 ёшга яқин очилди. Аммо ҳечдан кўра кеч деганларидек, афсусланишга ҳожат йўқ. 2019/20 йилги мавсум италиялик учун фаолиятидаги энг омадлиси бўлади. У А Сериянинг энг яхши тўпурари деб топилди. «Олтин бутса»ни қўлга киритди ва «бургутлар»нинг 12 йил ичида илк марта Чемпионлар Лигаси гуруҳ босқичига йўл олишида ёрдам берди. Катта эҳтимол билан Чиро 5 йиллардан сўнг айнан Рим клубида фаолиятини якунласа керак.
Мавзуга доир: Криштиану Роналду ва Лионель Мессидан кўпроқ гол урган «дарбадар» қирол — Чиро Иммобиле ҳақида
Клуби: «Рома»
Трансфер нархи: 45 миллион евро
Заниоло – Италиянинг энг яхши ёш футболчиларидан бири ҳисобланади. Николо ёшлигида «Женоа», «Фиорентина» академиялари ва «Интер»нинг ёшлар жамоасида тўп тепган. 2018 йил июль ойидан буён 21 ёшли ҳужумкор ярим ҳимоячи «Рома»да ўйнамоқда. Заниолога Рим ва, умуман, Италияда катта умидлар боғланган. Аммо йигитчанинг порлоқ келажаги хавф остида қолмоқда. Бир йил ичида футболчи ҳар иккала тиззасидан жиддий жароҳат (тиззанинг туташган суяклари ёрилиши) олди. Тўғри, италиялик ҳали ёш, аммо бу каби жиддий жароҳатлар из қолдирмай қўймайди.
Лоренцо Инсинье
Клуби: «Наполи»
Трансфер нархи: 48 миллион евро
Инсинье «Наполи» академияси битувчиси саналади. У мана 8 йилдирки, қадрдон жамоаси шарафини ҳимоя қилиб келмоқда ва ҳатто сардорлик боғичигача етиб келди. 29 ёшли Лоренцо неаполликлар билан бирга унчалик кўп соврин қўлга киритмаган – 2 бор Италия Кубоги ва бир марта мамлакат Суперкубогида зафар қучган. Аммо у клуб лагерида ҳурматга сазовор шахс ҳисобланади ва жамоа мухлислари уни Марадонанинг меросхўри деб атайди. Лоренцонинг кейинги фаолияти қандай кечмасин, у Неаполда доимо обрўли инсон бўлиб қолаверади.
Федерико Кьеза
Клуби: «Ювентус» (ижарада)
Трансфер нархи: 48 миллион евро
«Фиорентина» тарбияланувчиси ўз вақтида клубини тарк этиб, «Ювентус»га икки йиллик ижарага ўтди. «Бинафшаранглар» нурсиз ўйин кўрсатаётган бир вақтда Кьеза ўзининг нималарга қодир эканлигини кўрсатмоқда. 2020/21 йилги мавсумда 23 ёшли вингер «кекса синьора»га бир нечта ўйинларда ғалаба келтирди ва шу билан Андреа Пирлони аёвсиз танқидлардан қутқариб қолди. Шунингдек, Федерико ҳозирга қадар Италия терма жамоаси сафида ҳам 21 та ўйин ўтказиб, 1 та гол уришга муваффақ бўлди. Туринликлар Кьезани сотиб олишга ҳаракат қилиб кўриши аниқ, аммо бу арзонга тушмаслиги аниқ. «Фиорентина» президенти Рокко Комиссо ўз футболчиларини қадрлашни билади. Эҳтимол, шунинг учун ҳам у А Серия клублари эгалари орасида энг бойи бўлса керак.
Жоржиньо
Клуби: «Челси»
Трансфер нархи: 50 миллион евро
Жоржиньо – Маурицио Саррининг севимли футболчиларидан бири ҳисобланади. Мутахассис «Челси» бошқарувига келгач, «Наполи»да 3 йил шуғуллантирган ватандошини жамоага олиб келади. «Ювентус»да иш бошлаганидан сўнг ҳам Сарри яна Жоржиньони ўз жамоасига жалб қилишга уринди, аммо бу сафар ҳеч нарса ўхшамади. Шундан кейин бир мунча вақт футболчининг «кўклар» лагеридаги тақдири сўроқ остида қолди. Аммо ҳозир 29 ёшли ярим ҳимоячи Лондонда ўзининг учинчи мавсумини ўтказмоқда. Бу вақт ичида у жамоа билан бирга Европа Лигасида ғалаба қозонишга муваффақ бўлди (Сарри бошчилигида). Сарри «Ювентус»дан бўшатилганидан сўнг эса Жоржиньонинг атрофидаги миш-мишлар ҳам тўхтади.
Алессандро Бастони
Клуби: «Интер»
Трансфер нархи: 50 миллион евро
Бастони «Интер»да 2017 йилнинг августидан бери ўйнаб келади. «Нерадзурри» ёш ҳимоячини «Аталанта»дан 31 миллион еврога сотиб олади. Аввалига футболчи қатор клубларда ижара асосида саёҳат қилишга мажбур бўлди, аммо ҳозир у Милан клубининг барқарор ўйинчисига айланган. 21 ёшли марказий ҳимоячига бошқа клублар, жумладан, «Манчестер Сити» ҳам қизиқиш билдира бошлади. Ушбу қизиқишлар фонида «Интер» тезда италиялик учун янги шартнома таклиф қилди ва яқин орада унинг имзоланиши кутилмоқда. Антонио Контенинг жамоасида асосий ҳимоячи бўлиш – жиддий мақом бўлиб, бундан воз кечиш унчалик осон эмас.
Николо Барелла
Клуби: «Интер»
Трансфер нархи: 55 миллион евро
Барелла – қатъият ва ўз устида тинмай ишлашнинг ёрқин намунасидир. Афсуски, ёш футболчилар орасида бундайларнинг сони унчалик ҳам кўп эмас. Николо ёшлигидан «Интер»да ўйнашни орзу қилиб келган, футболчида бундай имконият 2019 йилнинг июлида пайдо бўлади. Ўшанда «нерадзурри» уни «Кальяри»дан 1 мавсумга ижарага олганди. Барелла Контедек инжиқ ва такаббур мураббийни шу даража ҳайратда қолдирдики, «қора-кўклар» италияликнинг трансферига 28 миллион евро сарфлашди. «Интер» 23 ёшли ярим ҳимоячига катта умидлар боғлаган, айниқса, Кристиан Эриксеннинг омадсиз трансферидан сўнг. Николо эса миланликлар унга бежиз ишонмаганини ҳар бир учрашувда исботлаб келади.
Марко Верратти
Клуби: ПСЖ
Трансфер нархи: 60 миллион евро
Верратти Италияда фақат ўзи тарбияланувчиси бўлган «Пескара»да ўйнаган, холос. 2012 йил июль ойида ПСЖ футболчини 12 миллион еврога сотиб олади.Ўшандан бери Марко парижликлар сафида тўп суриб келади. 2019 йил ёзида Италия клублари футболчига қизиқиш билдирди. Аммо у Франция пойтахтида қолишга қарор қилди ва Лига 1 чемпиони билан шартномасини 2024 йилнинг июнигача узайтирди. Парижда 28 ёшли ярим ҳимоячини ҳамма нарса қониқтиради. ПСЖда ўтказган 8 мавсум давомида Верратти бир неча бор Францияда ютиш мумкин бўлган барча совринларни қўлга киритди. Аммо Чемпионлар Лигаси ҳамон Вератти билан биргаликда бутун Париж учун орзу бўлиб қолмоқда.
Жанлуижи Доннарумма
Клуби: «Милан»
Трансфер нархи: 60 миллион евро
Қизиғи шундаки, ҳозирда энг қиммат италиялик икки футболчидан бири бу дарвозабондир. Бундан ташқари Доннарумма Европанинг камида энг яхши беш нафар дарвозабонидан бири ҳисобланади. Златан Ибрагимович ва Роберто Манчини эса уни дунёнинг энг яхши дарвозабони деб билади. Буффоннинг адаши атиги 21 ёшда бўлишига қарамай, аллақачон миланликларнинг асосий дарвозабони сифатида ўзининг олтинчи мавсумида қатнашмоқда ва 80 та баҳсда ўз дарвозаси дахлсизлигини сақлаб қолган. Бироқ клуб раҳбарияти ҳозирда у билан шартномани узайтириш жараёнини нима сабабдан кечиктираётгани тушунарсиз. Ёзда Доннарумма эркин агентга айланади, бундай футболчини текинга йўқотиш эса катта аҳмоқлик билан баробар. Томонларда барча жиҳатларни келишиб олиш ва биргаликда Чемпионлар Лигасига қадам қўйиш учун бир неча ой бор, холос.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)