Абу-Дабидаги (БАА) «Жангчилар ороли»да Тошкент вақти билан 24 январь, якшанба куни UFC 257 мусобақаси бўлиб ўтади.
Мусобақанинг асосий кардида ўзбекистонлик яккакурашчи Маҳмуд Муродов (24-6) ўзининг промоушендаги учинчи жангини ўтказади. Унга АҚШ вакили Эндрю Санчес (12-5) рақиб бўлади.
Таъкидлаш жоиз, Муродов — Санчес жанги аввалига прелим карддан ўрин олиши белгиланганди. Бироқ Оттман Азайтар ва Фривола ўртасидаги жанг бекор қилингач, ўзбекистонлик спортчи иштирокидаги жанг асосий кардга чиқарилган.
Маҳмуд Муродов UFC’да ҳозиргача иккита жанг ўтказган. У UFC’даги дебют жангида италиялик Алессио ди Кирикони (13-5) очколар ҳисобига кўра, иккинчи жангида Тревор Смитни (15-10) учинчи раундда нокаут эвазига мағлубиятга учратган.
32 ёшли Санчес 2016 йилдан буён UFC’да фаолият юритади. Шу вақтга қадар у промоушенда 10 та жанг ўтказиб, уларнинг еттитасида ғалаба қозонган. Америкалик яккакурашчи сўнгги жангини 2020 йилнинг августида Веллингтон Турманга қарши ўтказиб, рақибини нокаутга учратганди.
UFC 257 мусобақасининг асосий жанги енгил вазн тоифаси вакиллари Конор Макгрегор (22-4) ва Дастин Порье (26-6) ўртасида кечади. Мусобақа Тошкент вақти билан 05:00 да бошланади. Асосий кард жанглари эса 08:00 да бошланиши (аввалги жанглар қандай якунланишига қараб ўзгариши мумкин) режалаштирилган.
Изоҳ (0)