Abu-Dabidagi (BAA) “Jangchilar oroli”da Toshkent vaqti bilan 24-yanvar, yakshanba kuni UFC 257 musobaqasi bo‘lib o‘tadi.
Musobaqaning asosiy kardida o‘zbekistonlik yakkakurashchi Mahmud Murodov (24-6) o‘zining promoushendagi uchinchi jangini o‘tkazadi. Unga AQSh vakili Endryu Sanches (12-5) raqib bo‘ladi.
Ta’kidlash joiz, Murodov — Sanches jangi avvaliga prelim karddan o‘rin olishi belgilangandi. Biroq Ottman Azaytar va Frivola o‘rtasidagi jang bekor qilingach, o‘zbekistonlik sportchi ishtirokidagi jang asosiy kardga chiqarilgan.
Mahmud Murodov UFC’da hozirgacha ikkita jang o‘tkazgan. U UFC’dagi debyut jangida italiyalik Alessio di Kirikoni (13-5) ochkolar hisobiga ko‘ra, ikkinchi jangida Trevor Smitni (15-10) uchinchi raundda nokaut evaziga mag‘lubiyatga uchratgan.
32 yoshli Sanches 2016-yildan buyon UFC’da faoliyat yuritadi. Shu vaqtga qadar u promoushenda 10 ta jang o‘tkazib, ularning yettitasida g‘alaba qozongan. Amerikalik yakkakurashchi so‘nggi jangini 2020-yilning avgustida Vellington Turmanga qarshi o‘tkazib, raqibini nokautga uchratgandi.
UFC 257 musobaqasining asosiy jangi yengil vazn toifasi vakillari Konor Makgregor (22-4) va Dastin Porye (26-6) o‘rtasida kechadi. Musobaqa Toshkent vaqti bilan 05:00 da boshlanadi. Asosiy kard janglari esa 08:00 da boshlanishi (avvalgi janglar qanday yakunlanishiga qarab o‘zgarishi mumkin) rejalashtirilgan.
Izoh (0)