Ҳозирда Олий ва ўрта махсус таълим вазирлиги тасарруфида бўлган коллежлар Бандлик ва меҳнат муносабатлари вазирлигига ўтказилади. Бу ҳақда 21 январь куни Шавкат Мирзиёев Бухоро вилояти Олот туманида вилоят фаоллари билан бўлиб ўтган йиғилишда айтиб ўтди, деб хабар берди «Kun.uz».
«Ўзи коллежларнинг жойи шу вазирликда, олий таълимда эмас. Сабаби вазир Нозим Ҳусанов коллежларга аниқ буюртмалар шакллантириб беради. Коллежлар эса ҳар бир ҳудудларга зарур бўлган мутахассисларни тайёрлайди.
Давлат раҳбарининг айтишича, коллежлар ёшларни касбларга ўргатиб, бу бўйича сертификатлар беришни йўлга қўяди.
«Масалан, ҳозирги кунда пайвандчиларга талаб катта. Ана шундай касбни коллежлар тизимида ўргатиб, сертификат ҳам берилади. Ҳунар ўргангандан кейин чет элга борса ҳам иши юришаверади. Бундан ташқари, автомобиллар таъмирловчи, сартарош, этикдўз каби ўнлаб ҳунарлар бор. Мана, ишсизлик, темир дафтарни тугатиш бўйича аниқ режа», — деган Президент.
Шунингдек, «Ишга марҳамат» мономарказларни, маҳаллаларни коллежларга бириктиришни топширган.
Давлат раҳбарининг топшириғи билан 2020/2021-ўқув йилидан бошлаб мутлақо янги профессионал таълим тизими йўлга қўйилиши — 340 та касб-ҳунар мактаби, 147 та коллеж ва 143 та техникум ташкил этилиши белгиланганди. Кадрлар малакасини халқаро меҳнат бозори талабларига мослаштириш мақсадида Миллий малака тизими ишлаб чиқилади.
Изоҳ (0)