Ўзбекистонда 2023 йилга бориб инфляциянинг доимий мақсадли кўрсаткичи (таргет) 5 фоиз даражасида белгиланиши мумкин. Бу ҳақда Марказий банк раиси Беҳзод Ҳамроев 21 январь, пайшанба куни ўтказилган матбуот анжуманида маълум қилди, деб хабар беради «Gazeta.uz».
Давлат бюджети тўғрисидаги қонуннинг асосий макроиқтисодий кўрсаткичлар ривожланиш прогнозига кўра, 2021 йилда инфляция даражаси 9—10 фоиз, 2022 йилда 10—11 фоиз, 2023 йилда 7—8 фоиз бўлади. Бу инфляцияни 2022 йилда 8 фоизгача, 2023 йилда эса 5 фоизгача пасайтиришни режалаштирган Марказий банк прогнозларидан фарқ қилади.
Беҳзод Ҳамроев Марказий банк ва Молия вазирлигининг (2021 йилги Давлат бюджети тўғрисидаги қонунни ишлаб чиққан) инфляция борасидаги прогнозлари траекториясида фарқ борлигини тан олган, чунки «ҳар бир органнинг мустақил прогнози бўлиши мумкин».
«Аммо ўйлашимча, биз 2023 йилда инфляция борасида 5 фоизли таргетга эришамиз. Бунинг учун керакли барча нарса бор. Бу Марказий банкнинг шунчаки хоҳиши эмас, унинг асосида турли омил ва таъсирлар ҳисобга олинган аниқ ҳисоб-китоблар ётибди», — дейди у.
2020 йилнинг апрелида молия вазири ўринбосари Одилбек Исаков энергия ташувчилар нархини эркинлаштириш бўйича олдинги режалар коронавирус пандемияси сабаб номаълум муддатга қолдирилганини маълум қилганди.
Ноябрь ойида ҳукумат газ ва электр энергияси тарифларини 2021 йилгача ўзгаришсиз қолдириши маълум бўлганди. Марказий банк раиси ўринбосарининг айтишича, бу инфляция даражасини 10 фоиздан пастроқ даражада ушлаб туришнинг муҳим омилларидан ҳисобланади.
Беҳзод Ҳамроевнинг таъкидлашича, Марказий банк учун базавий инфляция (мева ва сабзавотлар нархлари ҳамда тартибга солинадиган нархлар ҳисобга олинмайдиган инфляция — таҳр.) асосий кўрсаткич бўлиб хизмат қилади. Агарда энергоресурслар нархининг либерализацияси бўйича чораларнинг асосий қисми 2022 йилда, қолгани 2023 йилда қабул қилинса, бу «ушбу вақтга бориб, базавий инфляция даражасини камайтириш учун вақт ва имконият беради».
«Прогнозимизга кўра, 2022 йилда 8 фоиз даражасида инфляцияни кутяпмиз, бунда тартибга солинадиган нархларнинг ўсиш таъсири ҳисобга олинган. 2023 йилда эса, албатта, инфляция 5 фоизгача пасайтирилади», — дейди у.
Марказий банк 21 январь куни асосий ставкани йиллик 14 фоиз даражасида ўзгаришсиз қолдирди. Регулятор 2021 йилда ЯИМнинг 4,5—5,5 фоизга ўсишини, инфляция эса 9—10 фоизгача пасайишини кутмоқда.
Изоҳ (0)