Жиззах вилояти ҳокимининг Мирзиёев томонидан «сиёсатга хиёнат қилган» деб топилган собиқ ўринбосарига нисбатан жиноят иши қўзғатилди

Жиззах вилояти ҳокимининг Мирзиёев томонидан «сиёсатга хиёнат қилган» деб топилган собиқ ўринбосари Акрам Раҳмонқуловга нисбатан жиноят иши қўзғатилди. Бу ҳақда Коррпусияга қарши курашиш агентлиги хабар берди.

Шавкат Мирзиёев 15 январь куни пойтахт туманларининг ҳокимлари ва сектор раҳбарлари билан учрашувда Жиззахдаги қулаб тушган бино воқеасига муносабат билдириб, Жиззах вилояти ҳокимининг саноатни ривожлантириш, капитал қурилиш, коммуникациялар ва коммунал хўжалик масалалари бўйича ўринбосари Акрам Раҳмонқуловни давлат сиёсатига хиёнат қилганликда айблаганди. Шундан сўнг вилоят ҳокимлиги матбуот хизмати Раҳмонқулов лавозимидан озод этилгани ва унинг ўрнига Баҳром Назаров тайинлангани тўғрисида хабар берди.

26 декабрь куни Telegram’даги  «Давлетовуз» канали «Жиззахча тендерлар-2» сарлавҳали янги суриштирувни эълон қилганди. Унга кўра, Жиззах вилояти ҳокимининг саноатни ривожлантириш, капитал қурилиш, коммуникациялар, коммунал хўжалик масалалари бўйича ўринбосари Акрам Раҳмонқулов Баҳриддиновичнинг қариндошлари ижтимоий ва бошқа соҳа объектларини қуриш бўйича бир неча юз миллиард сўмлик давлат буюртмаларини қўлга киритган. Қизиғи, Акрам Раҳмонқулов ўзи қариндошлари ютган тендерларда комиссия раиси сифатида ваколатли шахс бўлган.

Коррупцияга қарши курашиш агентлиги ва Ҳисоб палатаси томонидан Жиззах вилоят ҳокимлиги «Ягона буюртмачи хизмати» инжиниринг компанияси буюртмачилигидаги қурилиш объектларида давлат харидлари, давлат мулкини бошқариш ҳамда ундан фойдаланишда қонун ҳужжатларига риоя этилиши ўрганилган.

Ўрганишларда Молия вазирлиги Давлат молиявий назорати департаменти, ҳудудий Монополияга қарши курашиш бошқармаси, Давлат солиқ бошқармаси, Қурилиш вазирлиги ва бошқа соҳа мутахассислари ҳам иштирок этган.

Ишчи гуруҳи томонидан Жиззах вилоят архитектура ва қурилиш бошқармаси маъмурий биносининг қурилиши юзасидан ўтказилган танлов ҳужжатлари ўрганилганида, харид комиссияси аъзолари зиммасига юклатилган вазифаларни талаб даражасида бажармаганлиги, танлов иштирокчилари ва комиссия аъзолари ўртасида аффилланганлик хусусиятига эга алоқалар мавжудлигини била туриб, бунга қонуний муносабат билдирмагани ва ҳужжатларни сохталаштиргани аниқланган.

Танлов комиссияси аъзолари қурилиш объекти бўйича танловда иштирок этган барча талабгорларнинг («Қурилиш таъминоти» кўп тармоқли ишлаб чиқариш корхонаси, «Камол» кўп тармоқли қурилиш корхонаси ва «Абдувоҳид Қурилиш Таъмир» МЧЖлар) 100 фоиз улуши танлов комиссияси раиси (вилоят ҳокимининг собиқ ўринбосари) Акрам Раҳмонқуловнинг яқин қариндошларига тегишли бўлганини била туриб, бунга бирон-бир қонуний муносабат билдирмаган ва баённомага бу ҳақдаги маълумот киритилмаган.

Шунингдек, танлов ҳужжатларини ўрганиш давомида ғолиб деб топилган «Қурилиш таъминоти» кўп тармоқли ишлаб чиқариш корхонаси мансабдор шахслари танловда ноқонуний ғолибликни қўлга киритиш мақсадида корхона молиявий кўрсаткичлари, ишчи ходимларнинг қурилиш соҳасидаги маълумоти ва иш тажрибаси, шунингдек, танловда юқори балл олишда инобатга олинадиган маълумотларни қасддан ошириб кўрсатилганлиги аниқланган.

Мазкур ҳолатларга ҳужжатларни кўриб чиққан харид комиссияси аъзолари қонуний муносабат билдириш ўрнига, йиғилиш баённомаларига сохта ёзув ва маълумотларни киритиш йўли билан қалбакилаштириб, корхонани асоссиз ғолиб деб топган.

Юқоридагиларнинг натижасида, танловда ноқонуний ғолиб бўлган «Қурилиш таъминоти» кўп тармоқли ишлаб чиқариш корхонаси томонидан маъмурий бинонинг қурилишида бажарилмаган 1 миллиард сўмга яқин (905 миллион сўм ёки объект умумий қийматининг 8 фоизи) қурилиш ишларини тўловга асос бўлган ҳужжатларида қўшиб ёзиб киритиб, шу миқдордаги давлат бюджети маблағлари талон-торож қилинганлиги маълум бўлган.

Агентлик томонидан ўрганиш якунлари бўйича тўпланган ҳужжатлар қонуний баҳо берилиши учун Жиззах вилоят прокуратурасига юборилган.

Мазкур ҳужжатлар бўйича прокуратура томонидан ўтказилган терговга қадар текшириш якунлари бўйича Жиззах вилоятида қурилишда танлов савдолари ва нархларни шакллантириш комиссияси раиси Акрам Раҳмонқуловга, шунингдек, комиссия ва бошқа ташкилотлар, хусусий корхоналар мансабдор шахсларига нисбатан Жиноят кодексининг 167-моддаси (ўзлаштириш ёки растрата йўли билан талон-торож қилиш) 3-қисми «а» банди ва 205-моддаси (ҳокимият ёки мансаб ваколатини суиистеъмол қилиш) 2-қисми «а» банди, 209-моддаси (мансаб сохтакорлиги) 1-қисми билан жиноят иши қўзғатилган.

«Ҳолат юзасидан келгусида қўшимча ахборот тақдим этилади», — дейилади хабарда.