Ботир Зарипов Бухоро вилояти ҳокими лавозимига тасдиқланди. У 2020 йил 7 ноябридан бери Бухоро вилояти ҳокими вазифасини бажарувчи сифатида ишлаб келаётган эди.
22 январь куни халқ депутатлари Бухоро вилояти кенгашининг навбатдан ташқари 25-сессияси бўлиб ўтган. Президент Шавкат Мирзиёев иштирок этган сессияда ташкилий масала кўрилган, давлат раҳбари Ботир Зариповни вилоят ҳокими лавозимига тавсия қилган. «Балки Зарипов бундай вазифага тайёр эмасдир, лекин унда иштиёқ бор, ишлашга ҳаракат бор. Мен уни 3 ойдан бери синаяпман. Рози бўлсаларинг уни ҳоким қилиб сайлаймиз ва биргаликда ишлаймиз», — деб айтган президент.
Тавсия этилган номзод вилоят кенгаши депутатлари томонидан бир овоздан қўллаб-қувватланган. «Дарё» мухбири Мусулмонбек Иброҳимовнинг хабар беришича, президент Шавкат Мирзиёев Бухоро вилояти ҳокими лавозимига тасдиқланган Ботир Зарипов ҳақида фикр билдираркан, уни: «Бухоронинг шўр сувини, шамолини ютиб катта бўлган кадр. Аввалги ишлаган жойида йўқ бўлган соҳани тўрт йилда бор қилди. Ҳоким бўлиш осон эмас. Энг муҳими, бухороликларни яхши кўради», деб таърифлаган.Ботир Зарипов 1969 йил 20 ноябрда Ғиждувон туманида туғилган. 1997 йилда Тошкент молия институтини тамомлаган. 1997—1998 йилларда Миллий банкнинг Бухоро бўлинмаси Юридик ва жисмоний шахсларни кредитлаштириш бўлими бошлиғи, 1998 йилда Миллий банкнинг Бухоро бўлинмаси Қоровулбозор филиали қурилиши бошлиғи, 1998—2005 йилларда Миллий банкнинг Бухоро бўлинмаси Қоровулбозор филиали бошқарувчиси лавозимларида ишлаган.
2005—2006 йилларда Марказий банкнинг Бухоро вилояти бош бошқармаси бошлиғининг биринчи ўринбосари — Inkasсация бошқармаси бошлиғи, 2006 йилда Марказий банкининг Бухоро вилояти бош бошқармаси бошлиғининг биринчи ўринбосари, 2006—2008 йилларда Миллий банкнинг Бухоро бўлинмаси бошқарувчиси, 2008—2012 йилларда Марказий банк бошқаруви раисининг ўринбосари, 2012—2013 йилларда Марказий банк Нобанк кредит ташкилотларини назорат қилиш ва тартибга солиш департаменти директори, 2013—2015 йилларда Марказий банк Кредит ташкилотлари фаолиятини лицензиялаш ва тартибга солиш департаменти директори сифатида меҳнат қилган.
Ботир Зарипов 2015—2016 йилларда «Агробанк» бошқаруви раисининг биринчи ўринбосари, 2016—2019 йилларда «Ўзқурилишматериаллари» компанияси бошқаруви раиси, 2019—2020 йилларда эса янгидан ташкил этилган «Ўзсаноатқурилишматериаллари» уюшмаси бошқаруви раиси лавозимларида ишлаган. Зарипов Ўзбекистон мустақиллигининг 29 йиллиги муносабати билан президент фармонига кўра «Содиқ хизматлари учун» медали билан тақдирланган.
Изоҳ (0)