Jizzax viloyati hokimining Mirziyoyev tomonidan “siyosatga xiyonat qilgan” deb topilgan sobiq o‘rinbosari Akram Rahmonqulovga nisbatan jinoyat ishi qo‘zg‘atildi. Bu haqda Korrpusiyaga qarshi kurashish agentligi xabar berdi.
Shavkat Mirziyoyev 15-yanvar kuni poytaxt tumanlarining hokimlari va sektor rahbarlari bilan uchrashuvda Jizzaxdagi qulab tushgan bino voqeasiga munosabat bildirib, Jizzax viloyati hokimining sanoatni rivojlantirish, kapital qurilish, kommunikatsiyalar va kommunal xo‘jalik masalalari bo‘yicha o‘rinbosari Akram Rahmonqulovni davlat siyosatiga xiyonat qilganlikda ayblagandi. Shundan so‘ng viloyat hokimligi matbuot xizmati Rahmonqulov lavozimidan ozod etilgani va uning o‘rniga Bahrom Nazarov tayinlangani to‘g‘risida xabar berdi.
26-dekabr kuni Telegram’dagi “Davletovuz” kanali “Jizzaxcha tenderlar-2” sarlavhali yangi surishtiruvni e’lon qilgandi. Unga ko‘ra, Jizzax viloyati hokimining sanoatni rivojlantirish, kapital qurilish, kommunikatsiyalar, kommunal xo‘jalik masalalari bo‘yicha o‘rinbosari Akram Rahmonqulov Bahriddinovichning qarindoshlari ijtimoiy va boshqa soha obyektlarini qurish bo‘yicha bir necha yuz milliard so‘mlik davlat buyurtmalarini qo‘lga kiritgan. Qizig‘i, Akram Rahmonqulov o‘zi qarindoshlari yutgan tenderlarda komissiya raisi sifatida vakolatli shaxs bo‘lgan.
Korrupsiyaga qarshi kurashish agentligi va Hisob palatasi tomonidan Jizzax viloyat hokimligi “Yagona buyurtmachi xizmati” injiniring kompaniyasi buyurtmachiligidagi qurilish obyektlarida davlat xaridlari, davlat mulkini boshqarish hamda undan foydalanishda qonun hujjatlariga rioya etilishi o‘rganilgan.
O‘rganishlarda Moliya vazirligi Davlat moliyaviy nazorati departamenti, hududiy Monopoliyaga qarshi kurashish boshqarmasi, Davlat soliq boshqarmasi, Qurilish vazirligi va boshqa soha mutaxassislari ham ishtirok etgan.
Ishchi guruhi tomonidan Jizzax viloyat arxitektura va qurilish boshqarmasi ma’muriy binosining qurilishi yuzasidan o‘tkazilgan tanlov hujjatlari o‘rganilganida, xarid komissiyasi a’zolari zimmasiga yuklatilgan vazifalarni talab darajasida bajarmaganligi, tanlov ishtirokchilari va komissiya a’zolari o‘rtasida affillanganlik xususiyatiga ega aloqalar mavjudligini bila turib, bunga qonuniy munosabat bildirmagani va hujjatlarni soxtalashtirgani aniqlangan.
Tanlov komissiyasi a’zolari qurilish obyekti bo‘yicha tanlovda ishtirok etgan barcha talabgorlarning (“Qurilish ta’minoti” ko‘p tarmoqli ishlab chiqarish korxonasi, “Kamol” ko‘p tarmoqli qurilish korxonasi va “Abduvohid Qurilish Ta’mir” MChJlar) 100 foiz ulushi tanlov komissiyasi raisi (viloyat hokimining sobiq o‘rinbosari) Akram Rahmonqulovning yaqin qarindoshlariga tegishli bo‘lganini bila turib, bunga biron-bir qonuniy munosabat bildirmagan va bayonnomaga bu haqdagi ma’lumot kiritilmagan.
Shuningdek, tanlov hujjatlarini o‘rganish davomida g‘olib deb topilgan “Qurilish ta’minoti” ko‘p tarmoqli ishlab chiqarish korxonasi mansabdor shaxslari tanlovda noqonuniy g‘oliblikni qo‘lga kiritish maqsadida korxona moliyaviy ko‘rsatkichlari, ishchi xodimlarning qurilish sohasidagi ma’lumoti va ish tajribasi, shuningdek, tanlovda yuqori ball olishda inobatga olinadigan ma’lumotlarni qasddan oshirib ko‘rsatilganligi aniqlangan.
Mazkur holatlarga hujjatlarni ko‘rib chiqqan xarid komissiyasi a’zolari qonuniy munosabat bildirish o‘rniga, yig‘ilish bayonnomalariga soxta yozuv va ma’lumotlarni kiritish yo‘li bilan qalbakilashtirib, korxonani asossiz g‘olib deb topgan.
Yuqoridagilarning natijasida, tanlovda noqonuniy g‘olib bo‘lgan “Qurilish ta’minoti” ko‘p tarmoqli ishlab chiqarish korxonasi tomonidan ma’muriy binoning qurilishida bajarilmagan 1 milliard so‘mga yaqin (905 million so‘m yoki obyekt umumiy qiymatining 8 foizi) qurilish ishlarini to‘lovga asos bo‘lgan hujjatlarida qo‘shib yozib kiritib, shu miqdordagi davlat budjeti mablag‘lari talon-toroj qilinganligi ma’lum bo‘lgan.
Agentlik tomonidan o‘rganish yakunlari bo‘yicha to‘plangan hujjatlar qonuniy baho berilishi uchun Jizzax viloyat prokuraturasiga yuborilgan.
Mazkur hujjatlar bo‘yicha prokuratura tomonidan o‘tkazilgan tergovga qadar tekshirish yakunlari bo‘yicha Jizzax viloyatida qurilishda tanlov savdolari va narxlarni shakllantirish komissiyasi raisi Akram Rahmonqulovga, shuningdek, komissiya va boshqa tashkilotlar, xususiy korxonalar mansabdor shaxslariga nisbatan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) 3-qismi “a” bandi va 205-moddasi (hokimiyat yoki mansab vakolatini suiiste’mol qilish) 2-qismi “a” bandi, 209-moddasi (mansab soxtakorligi) 1-qismi bilan jinoyat ishi qo‘zg‘atilgan.
“Holat yuzasidan kelgusida qo‘shimcha axborot taqdim etiladi”, — deyiladi xabarda.
Mavzuga doir:
Izoh (0)