Ўтган йилларнинг ҳуснга таъсири: Аввалги гўзаллигидан асар ҳам қолмаган Болливуд актрисалари

Бир вақтлар мухлислар томонидан гўзаллиги эътироф этилган актрисаларнинг вақтлар ўтиб буткул ўзгариб кетиши ҳақида ким ҳам ўйлабди дейсиз.

Махима Чаудхари

«Юрак уриши», «Менга фақат севги керак» фильмларидаги роли билан яхши таниш бўлган актриса карьерасининг бошида феъл-атвори оғирлиги ҳақида миш-мишлар бўлган ва режиссёрлар у билан ишлашдан чарчаган. Актриса 2006 йилда Калкутталик архитектор Бобби Мукҳержи билан турмуш қурган, аммо фарзандли бўлганидан кейин ажрашиб кетган. Турмуши ўхшамаган актрисанинг номи ташқи кўринишидаги ўзгаришлар сабаб ОАВдан тушмаган.

Ҳар сафар юзидаги турли ўзгаришлар кўзга ташлана бошлаган. 2020 йилда Махима бу ўзгаришларга бундан 21 йил аввал автоҳалокатга учрагани сабаб бўлганини айтган. Маълум бўлишича, актриса суратга олиш майдончасига кетаётган вақтида юк машинаси уриб кетган.

Жарроҳлар унинг юзидан 67 та шиша бўлагини олган. У автоҳалокат билан боғлиқ воқеани бошқалар билишини истамаган. Бунга у вақтда одамлар уни қўллаб-қувватламагани, продюсерлар у билан ишлашдан бош тортишидан чўчиши сабаб бўлган.

Танушри Датта

2004 йилда Ҳиндистон гўзали деб топилган модель ва актрисанинг Болливуддаги дебюти 2005 йилда бўлган. Орадан 3 йил ўтиб эса актриса карьерасини давом эттиришни истамаган. Бунга актёр Нан Патекарнинг суратга олиш майдончасида хиралик қилгани сабаб бўлган. Ушбу воқеа сабаб унда руҳий тушкунлик кузатилган. Киносаноатни тарк қилишга қарор қилган актриса Ашрам ва Ладакхда яшаган ва медитация билан шуғулланган. Орадан вақтлар ўтиб ортга қайтганида «Ҳиндистон гўзали»дан асар ҳам қолмаган.

Мамта Кулкарни

90 йилларда машҳур бўлган актриса карьерасининг бошида энг яхши дебют йўналиши бўйича Filmfare мукофотини қўлга киритган. Суратга тушган «Каран ва Аржун» блокбастери эса машҳурликка эришган. Аммо 1998 йилда «Қасос ва қонун 2» фильмининг суратга олиш жараёнидан кейин ҳаммаси ўзгарган. Кейинчалик кинодан четлатилган актрисанинг қайтишига мафиозларнинг аралашгани сабаб бўлган, деган миш-мишлар тарқаган. Кейин наркобарон Вики Госвамига турмушга чиққан. Ҳаётидаги муаммолар эса унинг ташқи кўринишига ҳам таъсир қилмай қолмаган.

Тина Муним (Амбани)

Замонасининг энг гўзал ва чиройли актрисаси 1970 йилларнинг сўнгида суратга туша бошлаган ва тез орада машҳурликка эришган. У 4 йил давомида Санжай Датт билан учрашган. Ражеш Кханна билан 8 йил бирга яшаган. 1991 йилда бизнесмен Анил Амбанига турмушга чиққанидан кейин актриса кинематографияни тарк этган. Бир вақтлар ҳурилиқо бўлган актриса йиллар ўтгани сайин чиройини йўқотган. Косметик муолажаларни канда қилмаслигига қарамай, уни аввалги ҳоли билан солиштириб бўлмайди.

Рати Агнихотри

10 ёшидан моделлик фаолиятини бошлаган Рати кейинчалик актриса сифатида суратга туша бошлаган ва мухлислар қалбидан жой олган. 1985 йилда архитектор Анил Вирвани билан турмуш қурганидан кейин эса кинони тарк этган. 30 йиллик турмуши давомида турмуш ўртоғи томонидан хўрлангани ва азоблангани унинг нафақат руҳияти, балки ташқи кўринишига ҳам таъсир этган. Мухлислари унинг сўлғин кўриниб қолгани, кўзлари аввалгидек чақнамаслигини таъкидлаган. Бир вақтлар экранларни забт этган Ратидан асар ҳам қолмаган, 2015 йилда эри билан ажрашганидан кейин эса ўзига кела бошлаган.