Андижон шаҳрининг Марҳамат туманида ўзларини Президент администрацияси ҳузуридаги Ахборот ва оммавий коммуникациялар агентлигининг вакиллари деб таништирган шахслар боғча мудирасидан 200 минг сўм пора олаётганда қўлга олинди, деб хабар бермоқда агентлик матбуот хизмати.
Маълум бўлишича, Андижон шаҳридаги мактабгача таълим бўлимига қарашли 6, 33, 47, ва 61-сонли мактабгача таълим ташкилотларида ўзларини «Президент администрацияси ҳузуридаги Ахборот ва оммавий коммуникациялар агентлиги ходимлари» деб таништирган фуқаролар — А.А. ва М.А. муайян муаммоларни аниқлаб, муассасалар раҳбарларидан пул талаб қилган.
Хусусан, улар Андижон шаҳридаги 3 та мактабгача таълим ташкилотини текшириб, уларнинг фаолиятида турли камчиликларни аниқлаб, ташкилот раҳбарларидан жами 1 миллион сўмни ноқонуний тарзда талаб қилиб олган. Уларнинг хатти-ҳаракатларидан норози бўлган Андижон шаҳридаги мактабгача таълим бўлимига қарашли муассасалардан бирининг раҳбари мазкур ҳолат юзасидан вилоят ички ишлар бошқармасига мурожаат қилган.
Олиб борилган тезкор ҳаракатлар натижасида 19 январь куни А.А. ва М.А. Андижон вилоятининг Марҳамат туманида жойлашган 28-сонли МТТ фаолияти бўйича материал тайёрлаш мақсадида муассаса раҳбаридан 200 минг сўм миқдорида пул маблағи олаётган вақтида туман ички ишлар бўлими масъул ходимлари томонидан қўлга олинди. Уларга тегишли қалбаки гувоҳномалар ашёвий далил сифатида олиб қўйилган.
Текшириш давомида ушбу шахслар «Халқ иродаси» журнали таҳририяти томонидан берилган гувоҳномаларда Президент администрацияси ҳузуридаги АОКА номи ёзилган ҳамда давлат рамзи (герби) қўйилган гувоҳномалардан фойдаланиб, боғчалар фаолиятини текшириб юрганлиги аниқланган. Улар «Халқ иродаси» журнали таҳририятида жамоатчилик шартномаси асосида ишлаб келган.
Ҳозирда мазкур ҳолат юзасидан Андижон вилояти Марҳамат тумани ИИБ томонидан терговга қадар суриштирув ишлар олиб борилмоқда.
Эслатиб ўтамиз, 2020 йилнинг июнь ойида Бухорода АОКА номидан ноқонуний фойдаланиб иш тутган мухбирлар қўлга олинганди.
Изоҳ (0)