«Ҳокимнинг ташаббуси ёруғ кун пайтида момақалдироқ ургандек бўлди» – маҳалла раиси Жаҳонгир Ортиқхўжаевнинг МФЙларга нисбатан эътибори ҳақида

Халқ депутатлари Тошкент шаҳар Кенгашининг 19 январь куни бўлиб ўтган 31-сессиясида Тошкент шаҳар ҳокими Жаҳонгир Ортиқхўжаев пойтахтдаги мавжуд муаммоларни бартараф этиш учун ҳар бир маҳалла фуқаролари йиғинига 50 миллион сўмдан маблағ ажратилиши, намунавий деб топилган 50 та энг яхши маҳалла раисининг ҳар бирига ҳомийлар томонидан 50 та Spark автомобили берилишини маълум қилганди.

2021 йилнинг 21 январь куни Тошкент шаҳар ҳокимлигида ўтказилган Халқ депутатлари Тошкент шаҳар Кенгашининг 31-сессияси натижалари ҳамда жорий йил режаларига бағишланган матбуот анжуманидан сўнг Мирзо Улуғбек туманидаги «Катта Қорасув» МФЙ раиси, халқ депутатлари Тошкент шаҳар Кенгаши депутати Наима Жабборова журналист ва блогерларга интервью берди, дея хабар қилмоқда «Дарё» мухбири.

У пойтахт ҳокимининг ташаббуси тўғрисида муносабат билдираркан, «ҳеч қачон маҳалла раисига битта қалам ҳам мукофот сифатида берилмаган»лигини алоҳида қайд этди.

«Менимча, фаол ишлаган МФЙларга автомашина бериш фикри шаҳар ҳокимимизда ўзидан ўзи туғилмаган. Давлатимиз раҳбарининг Олий Мажлисга қилган Мурожаатномаси ҳамда вилоятларга бўлган ташрифлари давомида маҳалла ва унинг вакиллари ҳақида гапиргани, илиқ муносабатидан таъсирланган ҳолда шундай ташаббус билан чиққан, деб ўйлайман. Бу орқали маҳалла ходимлари янада фаол ишлаши шубҳасиз.

Биласизми, шаҳар ҳокимимизнинг ташаббуси ёруғ кун пайтида момақалдироқ ургандек бўлди. Нимага? Чунки ҳеч ким бу нарсани кутмаганди. Ҳеч қачон маҳалла раисига битта қалам ҳам мукофот сифатида берилмаган. Президентимиз шарофати билан маҳаллаларга аҳамият қаратиляпти. Тошкент шаҳар ҳокими маҳалла раисларини уйғотиш учун шу ташаббусни илгари сурмоқда, назаримда.

Шу ўринда фуқаролик фикримни айтиб ўтмоқчиман: мазкур машиналар халқига, маҳалласига, фуқароларига фидокорона ишлаётган МФЙ вакилларига берилади. Мисол учун, мени 350 нафар фуқаро раис этиб сайлади. Мен уларнинг ҳар бирининг овози, ишончини оқлашим керак. Маҳаллада шунақа шароит қилиб қўйиш керакки, одамлар шу ҳудудда яшаётганидан рози бўлиши, бошқа маҳаллага кўчиб кетишни хоҳламаслиги лозим. Агар мен нотўғри ишласам, одамларда менга ва давлат раҳбарига нисбатан норозичилик кайфияти уйғонади. Шунақа бўлмаслиги учун ҳам Президентимиз мамлакат миқёсида қандай ислоҳотлар амалга ошираётган бўлса, ҳеч йўқ, уларнинг ишини ўндан бирини маҳаллада қилишим керак. Қаердадир нимадир бўладиган бўлса, биринчи мен югуриб боришим лозим. Ўшанда аҳолининг розилигини оламан», — деди Наима Жабборова.