Бухорода фарзандининг ётоқхонасида гиёҳванд модда сақлаб келган ота қўлга олинди

Бухоро вилоят ИИБ ахборот хизмати раҳбари Шуҳрат Жалоловнинг «Дарё»га хабар беришича, фарзандининг ётоқхонасида гиёҳванд модда сақлаб келган шахс қўлга олинган.

Таъкидланишича, 2021 йилнинг 17 январь куни Жондор туман ИИБ ходимлари томонидан мурожаатга асосан тезкор тадбир ўтказилган. Тадбирда туманнинг «Тинчлик» маҳалласида яшовчи шубҳада бўлган 43 ёшли Ш.С.нинг яшаш уйи ва унинг атрофи ўрганилган.

Тадбир давомида кузатувда бўлган фуқаро хонадонининг болалар ётоқхонасидан гиёҳванд модда топилган бўлиб, у вилоят ИИБ Эксперт криминалистика бўлимида текшириб кўрилган. Хулосага кўра, топилган модда таркибида тетрагидроканнабинол гиёҳвандлик моддаси мавжуд бўлган марихуана эканлиги аниқланган. Унинг қуритилган ҳолдаги соф вазни 1,60 граммни ташкил қилган.

Ҳолат юзасидан туман ИИБ томонидан Ш.С.га нисбатан Жиноят кодексининг 276-моддаси 1-қисми (гиёҳвандлик воситалари, уларнинг аналоглари ёки психотроп моддаларни ўтказиш мақсадини кўзламай қонунга хилоф равишда тайёрлаш, эгаллаш, сақлаш ва бошқа ҳаракатлар) билан жиноят иши қўзғатилиб, дастлабки тергов ҳаракатлари олиб борилмоқда.