Жиззах вилояти ҳокимининг саноатни ривожлантириш, капитал қурилиш, коммуникациялар ва коммунал хўжалик масалалари бўйича ўринбосари Акрам Раҳмонқулов лавозимидан озод қилинди.
Вилоят ҳокимлиги матбуот хизмати хабарига кўра, ушбу лавозимга 2020 йилнинг ноябрь ойидан буён Қурилиш вазирлиги Пудрат ва махсус монтаж ишлари бозорини мувофиқлаштириш бошқармаси бошлиғи бўлиб ишлаб келаётган Баҳром Назаров тайинланди.
Шунингдек, Фориш тумани ҳокими бўлиб ишлаб келган Абдивали Мустанов Жиззах вилояти ҳокимининг молия-иқтисодиёт ва камбағалликни қисқартириш масалалари бўйича биринчи ўринбосари лавозимига тайинланди. Унинг ўрнига Икром Матиев Фориш туманига ҳоким этиб тайинланган.
Эслатиб ўтамиз, Шавкат Мирзиёев 15 январь куни пойтахт туманларининг ҳокимлари ва сектор раҳбарлари билан учрашувда Жиззахдаги қулаб тушган бино воқеасига муносабат билдириб, Акрам Раҳмонқуловни давлат сиёсатига хиёнат қилганликда айблаганди. «Жиззах вилояти ҳокимининг қурилиш бўйича ўринбосари бизнинг сиёсатимизга хиёнат қилган. Буни ҳамма билиши лозим. Унинг бутун тўдасига қонуний жазо кўриш керак. Шоли курмакциз бўлмаганидек, барибир эски замонни қўмсаган ноинсофлар ҳам бор. Улар эркинлик, очиқлик сиёсатини тушунмайди», — деган эди давлат раҳбари.
Шунингдек, Акрам Раҳмонқуловнинг қариндошлари ижтимоий ва бошқа соҳа объектларини қуриш бўйича бир неча юз миллиард сўмлик давлат буюртмаларини қўлга киритгани, унинг ўзи қариндошлари ютган тендерларда комиссия раиси сифатида ваколатли шахс бўлгани аниқланганди.
Акрам Раҳмонқулов Ўзбекистон Республикаси мустақиллигининг йигирма тўққиз йиллиги муносабати билан «Содиқ хизматлари учун» медали билан тақдирланганди.
Изоҳ (0)