Jizzax viloyatining bir qator tumanlarida 19-yanvar kuni hokimlar o‘zgardi. Bu haqda viloyat hokimligi matbuot xizmati xabar bermoqda.
2018-yil noyabr oyidan buyon Mirzacho‘l tumaniga rahbarlik qilib kelgan Komil Adhamovich Xolmurodov boshqa ishga o‘tishi munosabati bilan hokim lavozimidan ozod etilgan. Uning o‘rniga Sherzod Malikovich Ahmedov tuman hokimi lavozimiga tayinlangan.
Ma’lumot uchun, Sherzod Ahmedov 1978-yilda Zomin tumanida tug‘ilgan, 2000-yilda Toshkent irrigatsiya va qishloq xo‘jaligini mexanizatsiyalash muhandislari instituti va 2008-yilda Toshkent davlat iqtisodiyot universiteti tamomlagan. U 2016-yildan buyon “Agrobank”ning Jizzax viloyati boshqarmasi boshlig‘i edi.
2018-yil aprelidan beri Zafarobod tumaniga hokimlik qilib kelgan Ibrohim Qarshiboyev boshqa lavozimga o‘tganligi munosabati bilan lavozimidan ozod etilgan. Uning o‘rniga Nodirbek Muxtorovich Rajapov tuman hokimi lavozimiga tayinlangan.
Shuningdek, shu vaqtgacha Forish tumaniga hokimlik qilgan Abdivali Mustanov boshqa ishga o‘tgani munosabati bilan lavozimidan ozod etilgan. Uning o‘rniga Ikrom Sindorovich Matiyev Forish tumaniga hokim etib tayinlangan.
Avvalroq Qo‘rg‘ontepa tumaniga vaqtinchalik hokim tayinlangani, shuningdek, Bektemir tumani hokimi Jahongir Ibrohimov Yunusobod tumani hokimi etib tayinlangani, sobiq uy-joy kommunal xizmat ko‘rsatish vaziri esa Nurafshonga hokim bo‘lgani to‘g‘risida xabarlar berilgandi.Mavzuga doir: Toshkentning sobiq hokimi Rahmonbek Usmonov transport vazirining o‘rinbosari etib tayinlandi
