Сергелининг «Спутник-4» мавзесида дарахтлар экскаватор билан қўпориб ташланаётгани акс этган видеоёзувлар ижтимоий тармоқларда тарқалган эди. Ушбу ҳолат юзасидан Тошкент шаҳар экология ва атроф муҳитни муҳофаза қилиш бошқармаси матбуот хизмати изоҳ берди.
Аниқланишича, кўрсатилган ҳудудда ҳар хил турдаги 14 та дарахт ҳеч қандай рухсатномасиз илдиз қисмидан қўпориб ташланган. Дарахтлар Tashkent Industrial Export Center қурилиш майдонига олиб кирилган, олтита дарахт кўчириб ўтқазилган (аввалроқ бошқарма тўртта дарахт «Эко индустриал парк»га кўчириб ўтқазилгани ҳақида ахборот берганди).
«Ҳолат юзасидан ўсимлик дунёсига жами 151,19 миллион сўм зарар етказилган, тўпланган ҳужжатлар хуқуқни муҳофаза қилиш органларига юборилган», — дейилади бошқарма ахборотида.
Ўзбекистонда 2020 йил 3 декабрдан кучга кирган қонунга мувофиқ, ўрмон ёки бошқа дов-дарахтларни қонунга хилоф равишда кесишда айбдор деб топилганлар базавий ҳисоблаш миқдори (БҲМ)нинг 100 баравари (19 январь ҳолатига кўра 22,3 миллион сўм)дан 150 баравари (33,45 миллион сўм)гача миқдорда жарима ёки 240 соатдан 300 соатгача мажбурий жамоат ишлари ёки 1 йилдан 2 йилгача ахлоқ тузатиш ишлари ёхуд 1 йилдан 2 йилгача озодликни чеклаш ёки 3 йилгача озодликдан маҳрум қилиш билан жазоланади.
Изоҳ (0)