Чемпионлар Лигасидаги кетма-кет ғалабалар, Роналду билан хайрлашиш ва рекорд даражадаги трансфер харажатлари. Зинедин Зиданнинг «Реал»да ўтказган 5 йили

Бундан 5 йил олдин Зинедин Зидан «Реал» бошқарувини қабул қилиб олганди: 2016 йилнинг 4 январида француз «қироллик клуби» мураббийлар штабида Рафаэл Бенитеснинг ўрнини эгаллаган.

• Зизу ушбу лавозимни бир неча ойга тарк этганига қарамай, «Реал» тарихидаги сўнгги беш йил ҳеч шубҳасиз «Зидан даври» ҳисобланади.
• «Реал» сўнгги 12 совринидан 11 тасини айнан Зинедин Зидан бошчилигида қўлга киритган.
• Зидан «Реал»ни 236 ўйинда бошқарган (157 ғалаба, 46 дуранг, 33 мағлубият, тўплар нисбати: 558:245). Ушбу кўрсаткич бўйича Зинедин афсонавий Висенте дел Боскени ортда қолдирган (у «Реал»ни 233 учрашувда майдонга бошлаб тушган) ва клуб тарихида иккинчи ўринни эгаллаб турибди. Ундан олдинда фақат 595 учрашувда мадридликларга устозлик қилган Мигел Мунёс бормоқда.
• «Қаймоқранглилар» Зидан бошчилигидаги ўйинларнинг 67 фоизида ғалаба қозонган.
• Зизу «Реал»ни олиб чиққан барча 9 финалида ғалабага эришган.

Клуб тарихидаги рекорд трансфер харажатлари – 350+ миллион евро сарфланган

2019 йилнинг ёзда «қироллик клуби» трансфер бозорида қиролларга хос тарзда пул сарфлади, гарчи кўп сонли қиммат трансферлар ўзини оқламаган бўлса ҳам. Бу, айниқса, жароҳатларга мойил Эден Азарга (тахминларга кўра,115 —160 миллион евро) ва «Айнтрахт»га қайтариб юборилган Лука Йовичга (63 миллион евро) тааллуқлидир. Шунингдек, Эдер Милитао ҳам Рамос ва Варан даражасидан анча йироқ, шунинг учун ҳозирча фақатгина Ферлан Менди асосий таркибдан ўрин олиб келмоқда. Ёш Родриго ҳам ҳали умид қилиш даражасида, акс ҳолда «Реал» шунча пул эвазига анча кучайиб кетиши мумкин эди, аммо бундай бўлмади ва Зидан ҳамон трансфердаги муваффақиятсизликни синалган ва тажрибали футболчилар ёрдамида қоплаб келишга мажбур бўлмоқда.

Зиданнинг кетиши ва қайтиши

«Реал»даги «Зидан даври» тенг бўлмаган икки қисмга бўлинган: жамоани 2016 йил бошида бошқарган француз 2017/18 йилги мавсум охиригача бош мураббий бўлиб ишлади ва шундан сўнг у ўз лавозимини ҳақиқий ғолиб сифатида тарк этди. «Қироллик клуби» Зизу бошқарувидаги дастлабки уч мавсумнинг ҳар бирида Чемпионлар Лигасида ғолиб чиқди — ажойиб натижа.

Зидан ўзини жамоани яна-да кучлироқ қила оладиган одам сифатида кўрмаётганини айтди, аммо аслида кетишга Флорентино Перес билан трансфер сиёсати борасидаги қарашлари қарама-қарши келиб қолганди: президент Криштиану Роналдуни сотиб юборишни талаб қилди ва Гарет Бэйлни асосий юлдузга айлантирмоқчи бўлади. Зидан эса аксинча уэлслик футболчига ишонмайди ва Роналду ҳали сўнгги сўзини айтмаганини таъкидлайди.

Вақт ҳаммасини кўрсатиб берди, аммо Флорентино Перес хато қилганини тан олишга ва кечирим сўрашга ўзида куч топа олди. У Зиданни мураббийлик курсисига қайтишга кўндирди ва унга чинакам қироллик ваколатларини берди. 2018/19 йилги мавсум «Реал» учун омадсиз кечди, чунки аввал Лопетеги, кейин Солари бошқарувида жамоа ўз ўйинини йўқотиб бўлганди, аммо Зиданнинг 9 ойдан сўнг ўз вазифасига қайтиши клубга янги умидлар бағишлаганди.

Криштиану Роналду билан хайрлашиш

«Реал»нинг сўнгги беш йиллигидаги энг муҳим ва Зидан бевосита боғлиқ бўлмаган ягона воқеа — Криштиану Роналдунинг сотиб юборилиши бўлган. Аслида Зидан португалияликни сотишга қарши бўлган ва айнан Флорентино Переснинг Роналду билан хайрлашиш қарори французнинг 2017/18 йилги мавсум якунида жамоадан кетишида муҳим рол ўйнаган.

Роналду «Сантьяго Бернабеу»да 9 мавсум ўтказди, 438 учрашув, 450 гол. Криштиану «Реал» тарихидаги энг сермаҳсул футболчи бўлиб, у билан тўрт марта Чемпионлар Лигасини ютган ва Мадридда бўлган вақтида худди шунча «Олтин тўп»ни қўлга киритган.

2018 йилнинг ёзида Роналду «Ювентус»га ўтди, Турин клуби португалиялик учун 117 миллион евро тўлади ва тўрт йиллик шартнома имзолади. Италияда ўтган икки ярим мавсумда Роналду «Ювентус» сафида 104 учрашув ўтказди ва 83 та гол урди.

Ярим ҳимоя марказида Каземиро, Кроос ва Модричдан иборат афсонавий трионинг яратилиши

Ҳозир ярим ҳимояда «Реал»ни ушбу учликсиз тасаввур қилиш имконсиз, чунки Каземиро, Кроос ва Модрич мадридликларнинг янги ғалабаларига катта ҳисса қўшган. Ушбу трио Зинедин Зидан қўл остида «қаймоқранглилар» ярим ҳимоясида шаклланиб, катта кучга эга бўлди. Гарчи биринчи марта Рафаэл Бенитес қўл остида бразилиялик, германиялик ва хорватияликлар бирга ўйнаган бўлса ҳам, бу ротацияни яхши кўрадиган испаниялик мураббийнинг тажрибаларидан бири эди, холос.

Зидан келиши билан 4-3-3 схемасини танлади, аммо дастлаб у Кроосни таянч зонасига қўйиб, Модрич ва Искони олдинроқда ўйнатарди. Ижодкорлик даражаси шунчаки аъло даражада эди, ҳар бир ярим ҳимоячи моҳирона узатма бера оларди, аммо қарши ҳужумлар «Реал»нинг нозик нуқтасига айланди, майдон марказида мувозанат етишмасди. Зидан бошчилигида биринчи марта Каземиро, Кроос ва Модрич Чемпионлар Лигасидан ўрин олган «Рома»га қарши ўйинда (2:0) бирга ўйнади. Кейинчалик муҳим учрашувларда Зизу фақат ушбу футболчиларга ишонишни маъқул кўра бошлади ва бу ҳамон давом этмоқда.

Чемпионлар Лигасидаги кетма-кет 3 та ғалаба

Барча кўрсаткичлар бўйича шунчаки ажойиб ютуқ. Чемпионлар Лигаси ташкил этилгандан буён ушбу турнирда ҳеч бир клуб ғолибликни ҳимоя қилолмаган. Зидан ва «Реал» Чемпионлар Лигасида кетма-кет уч мавсум ғалаба қозонди, француз мураббийлик фаолиятини тўлиқ бошлаганидан атиги беш ой ўтибоқ биринчи совринини қўлга киритганди.

Чемпионлар Лигаси бош соврини йўлида «Реал» «Ювентус», «Бавария», ПСЖ, «Ливерпуль» ва бошқа бир қатор инглиз грандларини мағлубиятга учратди. Ақл бовар қилмас ҳикоя, буюк футболчи мураббийликда ҳам буюк ишларни амалга оширди. Яна қачон шунга ўхшаш воқеа юз берар экан?