ФИФА ва ОФК ҳаками Шерзод Қосимов Ўзбекистон футбол ассоциацияси (ЎФА) томонидан жазога тортилди.
ЎФА Этика қўмитаси Қосимовни бир қатор футбол учрашувларида учрашувга ёки унинг натижасига таъсир ўтказиш мақсадида келишувларда қатнашган деб топди. Қўмита қарорига кўра, Шерзод Қосимов ЎФА интизом кодексининг 5.44 бандига асосан уч йил муддатга футболга оид ҳар қандай фаолиятдан четлатилди. Бу қарор ЎФА томонидан эълон қилинган кундан бошлаб кучга кириши белгиланди.
Қайд этиш лозим, «Дарё» сентябрь ойида Қосимов Суперлиганинг 4 ўйинидан четлатилгани, бироқ бу ҳақда расмий баёнот берилмагани ҳақида ёзганди. Кейинчалик ФИФА ҳаками бу хабарни мутлақо ёлғон деб атаганди.
Эслатиб ўтамиз, ЎФА Этика қўмитаси 2020 йилнинг ноябрь ойида юқоридаги бандга кўра, бир қатор ҳакамларга жазо чораларини қўллаганди. Хусусан, ФИФА, ОФК ҳаками Жасур Мухторов 5 йилга, ЎФА ҳаками Темур Тўхтасинов бир йилга ва ЎФА ҳаками Аскер Нажафалиев эса 2020 йилги мавсум охиригача футболга оид фаолиятдан четлатилганди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)