Индонезияда 6,2 магнитудали зилзила юз бериши оқибатида камида уч киши ҳалок бўлди, деб ёзади «РБК» минтақанинг Табиий офат оқибатларини юмшатиш бўйича миллий агентлигига таяниб.
Ер ости силкинишлари Ғарбий Сулавеси провинциясида қайд этилган. Уч киши ҳалок бўлган, яна 24 киши жароҳатлар олган.
«Моддий зарар етган, шу жумладан, ‘Малеo’ меҳмонхонаси ва Ғарбий Сулавеси губернатори офиси жиддий даражада жабрланди», — дея аниқлик киритилади хабарда.
Бундан ташқари, дастлабки маълумотларга кўра, 62 та уй, тиббиёт маркази ва Мамужудаги ҳарбий офис вайрон бўлган. Учта жойда ер ўпирилишлари содир бўлган, оқибатда Мамужуни Мажене тумани билан боғловчи асосий йўл тўсилиб қолган. Ҳукумат зилзила таъсир қилган туманлардан маълумот йиғишда давом этмоқда.
Зилзила кучли бўлган, аммо 7 сониядан узоқ давом этмаган. Эпицентр 10 км чуқурликда жойлашган. Ер ости силкинишлари сунамини келтириб чиқармаган.
Associated Press ёзишича, минтақа Тинч океани ҳавзасидаги ёриқ чизиқларда, «оловли ҳалқа»да ва вулқонлар ёйида жойлашгани учун, Индонезияда зилзилалар тез-тез бўлиб туради.
Изоҳ (0)