Саудия Арабистони ҳукумати йўллар ҳам, автомобиллар ҳам бўлмайдиган улкан CO2-нейтрал шаҳри қурилишини эълон қилди. Меросхўр шаҳзода Муҳаммад ибн Салмон томонидан тақдим этилган лойиҳага кўра, узунлиги 170 километрга етадиган The Line номи остидаги шаҳарда миллион киши учун уй жойлашади ва 380 минг иш ўрни яратилади, деб хабар беради Motor.
The Line Саудия Арабистони шимоли-ғарбидаги Неом «ақлли» шаҳри ёнида кўтарилади. 460 километрга чўзилган Неомнинг ўзи Қизил денгиз қирғоғида жойлашган бўлиб, майдони 26,5 минг квадрат километрни ташкил этади. Шаҳар иқлим жиҳатидан нейтрал бўлади, у барча энергияни қайта тикланувчи манбалардан олади.
The Line уч қатламда қурилади. Юза қатламда турар жой бинолари ва ҳаёт учун барча зарурий инфратузилмалар жойлашади: мактаблар, клиникалар, боғлар ва кўнгилочар масканлар. Хизмат автомобиллар биринчи ерости сатҳи бўйлаб ҳаракатланади, иккинчиси бўйлаб эса сунъий интеллект билан бошқариладиган «ультратезкор» транспорт ўрин олади. Гап худди Hyperloop ҳақида кетмоқда. Таъкидланишича, шаҳарнинг бир нуқтасидан исталган бошқасига 20 дақиқадан камроқ вақт ичида етиб боради.
Шаҳзоданинг таъкидлашича, бу каби шаҳарни қуришдан мақсад — нафақат атроф-муҳитга ғамхўрлик қилиш, балки инсонларни ҳам ўйлашдан иборат. Унинг сўзларига кўра, 2050 йилга бориб бутун дунё бўйлаб бир миллиард инсон кам ифлосланган ҳудудлардан ўзига бошпана қидиришга тушади. Шунингдек, шаҳзода экологик вазият ёмонлашгани сабаб ўлим ҳолатлари ортаётганини эслатиб ўтган.
Дастлабки ҳисоб-китобларга кўра, «яшил» шаҳарни қуриш учун 100-200 миллиард доллар керак бўлади. Маблағларнинг асосий қисми Саудия Арабистони суверен бойлик фондидан олинади.
Мавзуга доир: Данияда автомобиллар юрмайдиган шаҳар қурилади
Изоҳ (0)