Буффондан Роналдогача. Чемпионлар Лигаси бош совринига эга чиқа олмаган юлдузлар

Катта футболга қадам қўйган исталган болакай борки, мамлакати терма жамоаси сафида мундиалда ўйнашдан ташқари, клублар ўртасидаги энг нуфузли мусобақа — Чемпионлар Лигасида тўп тепишни ҳам орзу қилади. Бироқ улардан саноқлиларигагина у ерда ўйнаш ва ғолиб бўлиш насиб этади. Бундайлар сирасига одатдагидек яна Криштиану Роналду (5 марта) ва Лионель Мессини (4 марта) киритиш мумкин. Аммо ҳозир юқорида номлари келтирилган омадли ўйинчилар ҳақида эмас, балки ушбу турнир бош совринини боши узра баланд кўтариш насиб этмаган таниқли футболчилар ҳақида фикр юритамиз.

Диего Марадона («Барселона», «Наполи»)

«Тилла бола» лақабини олган марҳум Диего Марадона ўтган асрнинг энг яхши футболчиси сифатида тан олинади. Бироқ унга Европа Чемпионлари Кубоги/Чемпионлар Лигасида ғалаба қозониш насиб этмаган. «Наполи»да ҳам «Барселона»да ҳам мусобақа ғолиблигини қўлга киритиш учун айтарли имкониятга эга бўлмаса-да, Марадона фаолиятининг асосий қисмини Европада ўтказган, шундай экан уни ушбу рўйхатга киритиш мантиқан тўғри бўлади.

Руд ван Нистелрой (ПСВ, «Манчестер Юнайтед», «Реал»)

Нидерландия терма жамоасининг собиқ футболчиси ўз вақтида Англия, Испания ва ўз мамлакати чемпионатларининг энг яхши тўпурари бўлган. Аммо унга ҳам «шалпангқулоқ»ни боши узра баланд кўтариш насиб этмаган. Гарчи Нистелрой Чемпионлар Лигасидаги голлари сони бўйича энг яхшилар қаторига кирса ҳам айнан сўнгги дақиқаларда омад ундан юз ўгираверган.

Павел Недвед («Лацио», «Ювентус»)

Чехиялик «Олтин тўп» соҳиби бир пайтлар дунёнинг энг яхши ярим ҳимоячилари қаторида тилга олинарди. «Ювентус» афсонаси 2003 йилда мусобақа совринига жуда яқин келади. Бироқ футболчи ярим финал баҳсида сариқ карточка олиб, ҳал қилувчи баҳсда жамоасига («Ювентус») ёрдам бера олмайди. Ким билсин, балки ўшанда Недвед майдонга тушганида «Милан» таслим этилармиди...

Роналдо («Реал», «Барселона», «Милан» ва «Интер»)

Ушбу рўйхатнинг энг ёрқин вакили, икки карра «Олтин тўп» соҳиби Роналдонинг Европа Чемпионлар Лигасида бирор марта ҳам ғалаба қозона олмагани кўпчиликни ажаблантириши бор гап. Боиси Роналдо фаолияти давомида «Реал», «Барселона», «Милан» ва «Интер» каби топ-клубларда тўп сурган. Кўриниб турибдики, футболда маҳорат ва тажрибадан ташқари омад ҳам яхшигина рол ўйнайди.

Златан Ибрагимович («Аякс», «Ювентус», «Интер», «Барселона», «Милан», ПСЖ, «Манчестер Юнайтед»)

Топ жамоаларда ўйнаш борасида Роналдодан асло қолишмайдиган швециялик Златан ҳозирча фантастик карьерасини якунлаганича йўқ. Эҳтимол, 2020/21 йилги биринчилик у учун охирги евромавсум бўлар. Ибранинг Чемпионлар Лигасидаги фаолияти ҳақида гап кетганда унинг ақл бовар қилмас даражадаги омадсизлигини эсламаслик имконсиз. Гап шундаки, у «Интер» ва «Барселона»ни тарк этгач, ҳар иккала клуб ҳам дарҳол Чемпионлар Лигасида ғолиб чиқади.

Жанлуижи Буффон («Ювентус» ПСЖ)

Дунёнинг энг яхши дарвозабонларидан бири Буффонга ҳам Чемпионлар Лигаси бош совринини қўлга киритиш ҳамон армонлигича қолмоқда. Фаолияти давомида у мазкур мусобақада уч маротаба финалга қадар етиб борган, аммо уларнинг барчаси муваффақиятсизлик билан тугаган. Катта эҳтимол билан 2020/21 йилги мавсум Буффон учун ҳам охирги имконият бўлади.