Нурафшонда ҳарбий ва махсус техника ишлаб чиқариш режалаштирилмоқда

Тошкент вилоятининг Нурафшон шаҳрида 12 гектар майдонда ҳарбий ва махсус техника ишлаб чиқаришни йўлга қўйиш режалаштирилмоқда. Лойиҳа 11 январь, душанба куни Президент Шавкат Мирзиёевга тақдимот қилинган, деб хабар беради «Gazeta.uz».

Лойиҳа 55 миллион доллар миқдорида баҳоланмоқда, у Ўзбекистон миллий банки кўмагида «Нурафшон-Махсус-Техника» компанияси томонидан амалга оширилади. Лойиҳа ўзининг 16 миллион доллар сармоясини ҳамда банкнинг 39 миллион доллар кредитини жалб қилади.

Биринчи босқичда 2021 йилдан бошлаб ҳарбий техника ишлаб чиқариш мақсад қилинган — йилига 100 та енгил зирхли «Тарлон» ва «Қалқон» машинаси. Биринчиси колонналарни ҳимоя қилиш ва кузатиб боришга, санитар ташиш, муҳандислик ишларини ўтказиш, радиация, кимёвий ва биологик разведка ва оловли қўллаб-қувватлашга мўлжалланган. Иккинчи машина ҳақидаги тафсилотларни олишнинг имкони бўлмаган. Фақат Президент матбуот хизмати эълон қилган суратлардан «Қалқон» машинаси ҳарбий-тактик мақсадларда фойдаланишга мўлжалланганини англаш мумкин.

Иккинчи босқичда 2022 йилдан бошлаб махсус техника — ёқилғи ташувчи 200 та автоцистерна, 300 та трактор, 500 та юк ташувчи, 400 та ахлат ташувчи, 100 та қор тозалаш ва 20 та ўт ўчириш машинасини ишлаб чиқариш режалаштирилмоқда.

Техникаларни маҳаллийлаштириш даражаси 50 фоизни ташкил этиши, йиллик талаб ҳажми 15 мингта техника, йиллик экспорт — 5 миллион доллар бўлиши, ўзини ўзи — 5 йилда қоплаши кутилмоқда.

«Нурафшон-Махсус-Техника» компанияси ҳақида

Krantas Group (таъсисчиси Мохир Каримов) саноатнинг турли соҳаларига ва қурилиш секторига махсус техникаларни, жумладан, юк кўтарувчи, махсус, қишлоқ хўжалиги техникаси, самосваллар ва бошқаларни ишлаб чиқаради. Тўйтепа металлоконструкциялари заводи эса 1964 йилдан бери қурилиш металл конструкцияларини ишлаб чиқариш билан шуғулланади.