Nurafshonda harbiy va maxsus texnika ishlab chiqarish rejalashtirilmoqda

Toshkent viloyatining Nurafshon shahrida 12 gektar maydonda harbiy va maxsus texnika ishlab chiqarishni yo‘lga qo‘yish rejalashtirilmoqda. Loyiha 11-yanvar, dushanba kuni Prezident Shavkat Mirziyoyevga taqdimot qilingan, deb xabar beradi “Gazeta.uz”.

Loyiha 55 million dollar miqdorida baholanmoqda, u O‘zbekiston milliy banki ko‘magida “Nurafshon-Maxsus-Texnika” kompaniyasi tomonidan amalga oshiriladi. Loyiha o‘zining 16 million dollar sarmoyasini hamda bankning 39 million dollar kreditini jalb qiladi.

Birinchi bosqichda 2021-yildan boshlab harbiy texnika ishlab chiqarish maqsad qilingan — yiliga 100 ta yengil zirxli “Tarlon” va “Qalqon” mashinasi. Birinchisi kolonnalarni himoya qilish va kuzatib borishga, sanitar tashish, muhandislik ishlarini o‘tkazish, radiatsiya, kimyoviy va biologik razvedka va olovli qo‘llab-quvvatlashga mo‘ljallangan. Ikkinchi mashina haqidagi tafsilotlarni olishning imkoni bo‘lmagan. Faqat Prezident matbuot xizmati e’lon qilgan suratlardan “Qalqon” mashinasi harbiy-taktik maqsadlarda foydalanishga mo‘ljallanganini anglash mumkin.

Ikkinchi bosqichda 2022-yildan boshlab maxsus texnika — yoqilg‘i tashuvchi 200 ta avtotsisterna, 300 ta traktor, 500 ta yuk tashuvchi, 400 ta axlat tashuvchi, 100 ta qor tozalash va 20 ta o‘t o‘chirish mashinasini ishlab chiqarish rejalashtirilmoqda.

Texnikalarni mahalliylashtirish darajasi 50 foizni tashkil etishi, yillik talab hajmi 15 mingta texnika, yillik eksport — 5 million dollar bo‘lishi, o‘zini o‘zi — 5 yilda qoplashi kutilmoqda.

“Nurafshon-Maxsus-Texnika” kompaniyasi haqida

Krantas Group (ta’sischisi Moxir Karimov) sanoatning turli sohalariga va qurilish sektoriga maxsus texnikalarni, jumladan, yuk ko‘taruvchi, maxsus, qishloq xo‘jaligi texnikasi, samosvallar va boshqalarni ishlab chiqaradi. To‘ytepa metallokonstruksiyalari zavodi esa 1964-yildan beri qurilish metall konstruksiyalarini ishlab chiqarish bilan shug‘ullanadi.