Жанубий Корея Ўзбекистон билан Эркин савдо шартномасини (ЭСШ) тузиш бўйича ишларни тезлаштиради. Бу ҳақда Жанубий Корея президенти Мун Чже Ин ўз мурожаатида маълум қилди, деб хабар беради «Gazeta.uz».
«Биз Филиппин, Камбоджа ва Ўзбекистон билан ЭСШ музокараларини тезлаштириш орқали Янги Жанубий ва Янги Шимолий сиёсат бўйича алмашинув ва ҳамкорликни кенгайтирамиз», — деди президент.
Ўтган йилнинг июль ойи охирида Сеулда икки мамлакат ўртасида эркин савдо тўғрисида битим бўйича жамоатчилик тинглови бўлиб ўтган эди.
Жанубий Корея Ўзбекистоннинг асосий ташқи савдо ҳамкорлари рўйхатида тўртинчи ўринни эгаллаб турибди. Давлат статистика қўмитаси маълумотларига кўра, 2019 йилда икки мамлакат ўртасидаги савдо ҳажми 2,755 миллиард долларни (импорт — 2,661 миллиард доллар, экспорт — 93,6 миллион доллар), 2020 йил январь-сентябр ойларида — 1,599 миллиард долларни (импорт — 1,565 миллиард доллар, экспорт — 34,1 миллион) ташкил этган.
Август ойида Жанубий Корея оммавий ахборот воситалари Ўзбекистон Президенти Шавкат Мирзиёев Сеулга 2020 йил охиригача ташриф буюриши мумкинлиги ҳақида хабар берган эди, аммо ташриф амалга ошмади.
Эслатиб ўтамиз, Шавкат Мирзиёев 2017 йил ноябрь ойида Жанубий Кореяга ташриф буюрган эди. 2019 йил апрель ойида президент Мун Чже Ин Ўзбекистонга ташриф буюрди.
Изоҳ (0)