Жиззах шаҳрининг Мустақиллик кўчасида қурилаётган кўп қаватли уйнинг бир қисми 10 январь куни қулаб тушгани, қурилиш «Чорвадор-Қоракўл-Барака» компанияси томонидан олиб борилгани ҳақида хабар берилганди. ЎзА қулаган иншоот эгаси «Чорвадор-Қоракўл-Барака» МЧЖ эмас, «Баракали қоракўл чорвадор» фермер хўжалиги эканлигини маълум қилди.
«Gazeta.uz»нинг ёзишича, Жиззах вилояти қурилиш бош бошқармаси бошлиғи Маҳмуд Турсунов таҳририят мухбири билан суҳбатда мазкур маълумотни тасдиқлади. У фермер хўжалиги «Архитектура-қурилиш назорати давлат инспекциясида рўйхатдан ўтган»ини таъкидлаган. Қўй наслчилиги билан шуғулланувчи фермер хўжалиги турар-жой бинолари қурилиши билан шуғулланишга ҳуқуқи бор ёки йўқлигига оид саволга Маҳмуд Турсунов агар ушбу йўналиш фермер хўжалик низомида кўрсатилган бўлса, унда мумкин, дея жавоб берган.
Махмуд Турсунов, шунингдек, ҳозирча фермер хўжалиги аввал қурилиш ишлари билан шуғуллангани ҳақида бирор маълумотга эга эмаслигини ҳам тан олган. Унинг сўзларига кўра, бу далилларни ўрганиш унинг вазифасига кирмайди — бу билан ҳуқуқни муҳофаза қилиш органлари шуғулланади.
Таъкидланишича, қурилишнинг буюртмачиси ҳам, пудратчиси ҳам унинг эгаси, яъни — Баракали Қоракўл Чорвадор фермер хўжалигининг ўзи бўлган. «Ҳозирча саволлар кўп. Саволларга фермер хўжалиги иш бошқарувчи Акмал Бобоев: — Шукур, ҳодиса дам олиш куни содир бўлгани учун одамлар жабрланмади, — деб жавоб берди», дейилади хабарда.
Корхона ва ташкилотларнинг ягона давлат реестри маълумотларига кўра, фермер хўжалиги 2017 йилнинг августида рўйхатдан ўтган. Фориш тумани «Дарвоза» МФЙ ҳудудида — қоракўл қўй зоти наслчилиги билан шуғулланади. Баракали Қоракўл Чорвадорнинг ягона раҳбари ва таъсисчиси Абдуллахакимов Жаҳонгир Шуҳрат ўғли ҳисобланади.
«Gazeta.uz» мухбири вазиятга ойдинлик киритиш мақсадида фермер хўжалик раҳбари билан боғланиб, унинг олдин ҳам қурилиш билан шуғулланган ёки йўқлиги билан қизиққан. Абдуллахакимов «бинони ўзи мен қурмаганман», дея жавоб берган.
«Қурилиш қилмоқчи бўлганман, қиммат бўлгани сабабли уни қилолмас эканман, деганман. Кейин, 2020 йил апрель ойида фуқаро Абдураҳим Бобоевга ўтказилган мулк ҳуқуқи. Нолдан қурган одам шу киши. Бугун (11 январь) терговчига бориб учрашиб, ҳамма ҳужжатларни тақдим қилдим. Тушунтириш хати ёзиб бердим, бу нарсага менинг умуман алоқам йўқлигини айтдим. Бошида икки қаватли дўконларни давом эттирмоқчи эдим. Бу йўлнинг усти, икки қаватли бино бўлса, ‘снос’га тушади, деган гап бўлганидан кейин, кўп қаватли қураман деб, Жиззах шаҳар ҳокимиятига ариза берувдим. Лекин унга кучим етмади, қилолмадим. Абдураҳим Бобоевга ҳамма ҳужжатларни топшириб юборганман. Кўчмас мулкни келгусида қурилиш билан шуғулланиш учун бермаганман, қурилиш қилолмайман деб, кўчмас мулкни сотганман. Мен уни бегоналаштирдим, кейин умуман аралашмадим», — деган Жаҳонгир Абдуллахакимов.
ЎзА хабарида фермер хўжалик иш бошқарувчиси Акмал Бобоев ҳақида ҳам маълумотлар келтирилган. Жаҳонгир Абдуллахакимовнинг айтишича, у кўчмас мулкни сотиб олган Абдураҳим Бобоевнинг ўғли ҳисобланади ва фермер хўжаликка умуман алоқаси йўқ.
У, шунингдек, Абдураҳим Бобоев телефон рақами ва унинг компанияси ҳақида ҳеч нима билмаслигини айтди. Қолаверса, бу иш билан шаҳар прокуратурасида терговчи Толмас Раҳмонов шуғулланаётганини қўшимча қилган. Терговчи «Gazeta.uz» мухбири билан суҳбатда ҳозирда терговга қадар текширув ҳаракатлари олиб борилаётгани ва ҳеч қандай ахборот бера олмаслигини қайд этган.
Вазирлар Маҳкамасининг фармойиши билан Жиззахда қурилиши тугалланмаган олти қаватли уйнинг қулаб тушиши сабабларини ўрганиш бўйича Очилбой Раматов бошчилигидаги ҳукумат комиссияси тузилганди. Ҳукумат комиссияси 12 январь куни Жиззах шаҳрида қурилаётган кўп қаватли турар-жой биносининг қулаши сабабларини ўрганиш ҳамда келгусида шу каби ҳолатларнинг олдини олиш бўйича йиғилиш ўтказиши режалаштирилган. «Дарё» манбасининг хабар беришича, Очилбой Раматов Жиззахдаги воқеа жойига етиб борди. Йиғилишда барча комиссия аъзолари ҳамда тегишли вазирлик ва идоралар ходимлари ҳам иштирок этади.
Изоҳ (0)