Вазирлар Маҳкамасининг фармойиши билан Жиззахда қурилиши тугалланмаган олти қаватли уйнинг қулаб тушиши сабабларини ўрганиш бўйича ҳукумат комиссияси тузилди, дея хабар бермоқда ҳукумат матбуот хизмати.
Жиззах шаҳар Мустақиллик кўчасида жойлашган, дастлабки икки қавати савдо дўконларига, учинчи—олтинчи қаватлари эса квартираларга ажратилиши кўзда тутилган бинонинг бир қисми 10 январь куни соат 17:15 атрофида қулаб тушган эди. Маълум бўлишича, қурилиш «Чорвадор-Қоракўл-Барака» компанияси томонидан олиб борилган.
10 январданоқ ўз ишини бошлаган ҳукумат комиссиясига бош вазирнинг биринчи ўринбосари Очилбой Раматов раҳбар этиб тайинланган. Комиссия таркибига прокуратура, Фавқулодда вазиятлар вазирлиги, Қурилиш вазирлиги, Саноат хавфсизлиги давлат қўмитаси ва бошқа вазирликлар, идоралар, экспертлар ҳамда пудрат ташкилотлари мутахассислари киритилган.
Комиссия зиммасига олти қаватли уйнинг қулаб тушиш сабаблари, бунга омил бўлган ҳолатлар, лойиҳа ҳамда пудратчи ташкилот томонидан уйнинг барпо этилиши даврида шаҳарсозлик норма ва қоидаларига риоя этилганлиги ўрганиб чиқиш чиқиш вазифаси юклатилган.
Шунингдек, комиссия бундай ҳолатларнинг олдини олиш бўйича амалдаги норматив-меъёрий ҳуқуқий ҳужжатларни ўрганиб чиқиб, таклиф ҳам киритиши кераклиги белгилаб қўйилган.
Аввалроқ ҳодиса оқибатида тан жароҳати олган ва ҳалок бўлган фуқаролар йўқлиги ҳақида ахборот берилган эди.
Изоҳ (0)