Йилнинг биринчи дайжестини тузарканмиз, хаёлдан ўтди. Ҳавонинг совуши совуқ хабарлар кўпайишига тўғри пропорсионал бўлар экан. Акс ҳолда «об-ҳаво шароитининг ноқулай келганлиги сабабли...» деб изоҳланувчи хабарлар қаёқда эди?
Президент Шавкат Мирзиёев 4 январдан қисқа меҳнат таътилига чиқди. У таътилни Ўзбекистонда ўтказади. Бу Шавкат Мирзиёевнинг Президент лавозимига киришганидан бери (салкам беш йилда) иккинчи марта меҳнат таътилига чиқишидир. Бундан аввал Президент 2019 йил августида қисқа муддатли меҳнат таътилига чиққан эди. Ўшанда бу унинг сўнгги 17 йиллик фаолиятидаги биринчи меҳнат таътили экани айтилганди.
Айтиш лозимки, мустақил Ўзбекистоннинг биринчи президенти даврида давлат раҳбари меҳнат таътилига чиққани жамоатчиликка эълон қилинмаган. Ислом Каримов йилда икки марта – ёзда 15 кун ва қишда етти кун мунтазам меҳнат таътили олган. Буни фақат Президент девонидагилар билишарди.
Дарвоқе, президент бошқарувига оид яна бир янгилик. 1 январдан Ўзбекистон Президентининг расмий сайти янгиланди. Сайт дизайни бутунлай ўзгарди ва Президент администрациясининг Ижро этувчи аппарати раҳбарлари, маслаҳатчилар, департамент раҳбарлари тўғрисидаги маълумот билан тўлдирилди. Илгари бу маълумот очиқ манбада бўлмаган.
* * *
«Танишбилишқурилиш» МЧЖлар ҳақидаги янгиликларимизни давом эттирамиз. Нишонда Навоий вилояти.
2019 йилнинг 19 мартидан Навоий вилоят ҳокимлиги «Ягона буюртмачи хизмати» инжиниринг компаниясига, яъни вилоятдаги қурилишлар бўйича асосий давлат буюртмачисига Мансуров Баҳодир Пулатович раҳбар этиб тайинланди. Очиқ маълумот асосида ўрганишлар шуни кўрсатдики, Баҳодир Мансуров оиласига тегишли бўлган «Мехрангез Б-2002» МЧЖ бир неча миллиард сўмлик давлат буюртмаларини қўлга киритган. Булар ичида мактабни реконструкциялаш ва боғчани мукаммал таъмирлаш каби йирик ишлар бор.
Очиқ маълумотларга кўра, Навоий вилоят ҳокимлиги «Ягона буюртмачи хизмати» инжиниринг компанияси Баҳодир Мансуров раҳбарлик қилган даврда бош муҳандис бўлиб ишлаган, 2020 йилнинг июлидан компания директори вазифасини бажарувчи сифатида фаолият юритиб келаётган Турдиев Алишер Баҳромович оиласига тааллуқли компания — «Баҳромбек келажаги» МЧЖ ҳам бир неча миллиард сўмлик давлат буюртмаларини қўлга киритиб келган. Компания улуши тўлиғича Мавлонов Жавлонбек Абдуҳамидовичга тегишли. «Давлетовуз»нинг маълум қилишича, у Алишер Турдиевнинг куёви — синглисининг турмуш ўртоғи ҳисобланади.
«Баҳромбек келажаги» МЧЖ Инқирозга қарши курашиш жамғармаси маблағи ҳисобидан молиялаштирилган Навоий вилояти Навбаҳор туманидаги 24-мактабни реконструкция қилиш (160 ўринли ўқув блоки қуриш) объекти бўйича тендерда (2 миллиард сўмдан ортиқ), Кармана тумани 20-сонли умумтаълим мактабини реконструкция қилиш (180 ўринли ўқув блоки қурилиши) бўйича танловда (1,8 миллиард сўмга яқин), Зарафшон шаҳридаги «Кичик саноат зонаси» ҳудудида сув ва канализация таъминоти учун ташқи муҳандислик тармоқларини қуриш бўйича танловда (108 миллион сўм) ғолиб бўлган. Бу куёвни навоийчасига сийлаш бўлса ажаб эмас.
* * *
Яқингача учириш тақиқланган дронлар энди давлат хизматида. 1 январдан бошлаб Фарғона вилоятида йўл ҳаракати қоидаларига ва жамоат жойларида тиббий ниқоб режимига риоя этилиши устидан дронлар ёрдамида назорат ўрнатилди. Учар аппаратлар йўл чизиқлари ва светофорга риоя қилмаган, меъёридан тез юрган ва пиёдаларга йўл бермаган ҳайдовчиларни ҳамда ниқоб тақмаган ва жамоат тартибини бузган фуқароларни қайд қилади.
Аммо кузатув камераси, фоторадар, дрон каби назорат ускуналари кўпайгани ва такомиллашгани сари ҳуқуқбузарлар ҳам устамон бўлиб кетяпти. 7 январь куни Жиззахда давлат рақамига «Груз-200» деб ёзиб олган Cobalt тўхтатилди. Ҳайдовчи посбонларга инсон жасадини олиб кетаётганини тушунтирди, бироқ текширилганида салонда жасад йўқлиги, ҳайдовчи рақамини яшириш учун қоғоз ёпиштириб олгани маълум бўлди. Бошқа бир Epica эса давлат рақамига лой чаплаб, фоторадарга кўринмасликка уринган. Ҳар иккала ҳайдовчи жавобгарликка тортилди.
* * *
Булдуруқ номли табиат ҳодисаси нам ҳаво таркибидаги сув кристаллашганда содир бўлади. Аввал ҳам Ўзбекистонда булдуруқ тушган ҳолатлар бўлган, аммо охирги ҳафтада мамлакатимиз батамом булдуруққа бурканди.
Мавзуга доир:
Қаҳратон совуқ исиниш билан боғлиқ фожиаларни ўзи билан олиб юради. 6 январь куни Қаршида газ портлашидан икки нафар бола ҳалок бўлди. 8 январда Хивадаги хонадонлардан бирида газ портлаб, 15 яшар қизнинг умрига зомин бўлди. Кеча Сирдарё вилоятида ис газидан заҳарланиш оқибатида 33 ёшли эркак ва унинг 26 ёшли турмуш ўртоғи вафот этди.
«Ўзгидромет» мутахассисларининг айтишича, бундай давомли қаҳратон охирги 10 йилда кузатилмаган. Аммо об-ҳавони мониторинг қилувчилар дам олиш кунидан бошлаб ҳаволар аста-секин илишини башорат қилди.
* * *
Ёшлар ишлари агентлиги 2020 йилда оммавий ахборот воситаларида энг фаол ёритилган, тизим фаолиятида очиқлик ва шаффофликни намоён этган, халқ билан ишлашда самарали натижаларга эришган давлат ва хўжалик бошқаруви органлари, жамоат ташкилотлари ва фаолларни аниқлаб, тақдирлаш маросими ўтказди. Номзодларни саралаш қарийб икки ой давом этиб, сўровнома иштирокчиларидан «Энг намунали ҳудуд», «Энг намунали вазирлик», «Энг кўп ўзгариш қилган ташкилот», «Энг намунали давлат ва жамоат ташкилоти» сингари ўнлаб номларни аниқлашда овоз бериш ҳам сўралган. Айтишларича, онлайн сўровномани 2 миллионга яқин иштирокчи кузатган. Энг кўп овоз олган номзодлар кейинги босқичда 50 нафардан зиёд журналист ва блогерлар ўртасида ўтказилган сўровномага асосан аниқланган.
Шундай қилиб, «2020 йилнинг энг намунали туман ва шаҳри» Фарғона, «2020 йилнинг энг намунали вазирлиги» Адлия, «2020 йилнинг энг намунали ҳудуди» Самарқанд вилояти, «2020 йилнинг энг намунали давлат ташкилоти» Давлат хизматлари агентлиги, «Йилнинг энг фаол матбуот котиби» ССВ Жамоатчилик билан алоқалар бўлими раҳбари Фурқат Санаев, «2020 йилнинг энг фаол жамоат ташкилоти» Ўзбекистон Истеъмолчилар ҳуқуқларини ҳимоя қилиш жамиятлари федерацияси, «2020 йилнинг энг етакчи партияси» Ўзбекистон Либерал-демократик партияси, «2020 йилнинг энг ижтимоий фаол фуқароси» Ақида Абидовна Махирова (блогер Ақидахоним), «Нефть ва газ соҳасида энг илғор корхона» Eriell Group компанияси, «2020 йилда халқ ишончини қозонган банк тизими» «Ўзсаноатқурилишбанк», «Йил қаҳрамони» Пандемия даврида ҳалок бўлган шифокорлар, «Йил одами — 2020» Ўзбекистон Республикаси Олий Мажлиси Қонунчилик палатаси депутати Расул Кушербаев деб эътироф этилди.
«Дарё»ни кузатиб боринг. Бизнинг «Дарё» қаҳратон совуқда ҳам музламасдан сизга қайноқ хабарларни тақдим қилишда давом этади.
Изоҳ (0)