Андижон шаҳри ичимлик сувисиз қолди. Вилоят ҳокимлиги аҳолидан сув ғамлашни сўради

Андижон шаҳрига ичимлик суви етказиб берувчи «Хонобод—Андижон» марказий сув қувурининг Андижон тумани «Хортум» маҳалласида жойлашган сув тақсимлаш жиҳозида 9 январь куни носозлик юзага келди, дейилади «Андижон сув таъминоти» компаниясининг вилоят ҳокимлиги томонидан эълон қилинган баёнотида.

Таъкидланишича, ушбу носозлик оқибатида 11—12 январь кунлари аҳолига сув етказиб беришда узилиш юзага келиши мумкин. Шу муносабат билан, компания Андижон шаҳри аҳолисидан узр сўраган ҳолда, уларни ичимлик суви захирасини яратиб олишга чақирган.

Компаниянинг қайд этишича, Андижон шаҳрига Жалақудуқ туманида жойлашган «Пахтакор» ерости сув иншооти орқали ичимлик суви етказиб бериш чоралари кўрилмоқда. Шунингдек, 20 та махсус сув ташиш машинаси хизматга шай ҳолатга келтирилган.

Telegram’даги «Водий бозор» каналининг хабар беришича, авария оқибатида Андижон шаҳри тўлиқ, Андижон ва Олтинкўл туманларининг бир қисми ичимлик суви таъминотидан узилган.

«Аварияни бартараф этиш учун катта куч ташланган. Воқеа жойига махсус чодирлар тикилди. Вилоят ҳокими ва бошқа раҳбарлар ўша ерда. Ишлаётган ходимларга мол сўйилиб, эҳсон қилинмоқда», — дейилади канал хабарида.

«Андижон бугун» Telegram-каналида эса шаҳар аҳолиси дўконларда кўплаб миқдорда ичимлик суви сотиб олаётгани акс этган видеоёзув эълон қилинган.