Олий Мажлис Сенати ва Коррупцияга қарши курашиш агентлиги ўртасида ҳамкорлик кузатилмади. Бу ҳақда Олий Мажлис Сенатининг ўн биринчи ялпи мажлисида сенат раиси Танзила Норбоева айтиб ўтди.
Мажлисда Танзила Норбоеванинг таъкидлаб ўтишича, Коррупцияга қарши курашиш агентлиги билан Олий Мажлис Сенати ўзаро ҳамкорликни кучайтириши лозим.
Давлат раҳбари томонидан агентликка кенг ваколатлар берилди, коррупцияга қарши курашишда у асосий ваколатли органга айлантирилди. Аммо парламент, шу жумладан, Сенатнинг суд-ҳуқуқ ва коррупцияга қарши курашиш қўмитаси билан агентликнинг деярли ҳамкорлиги кузатилмади, десак бўлаверади. Бу йўналишда қўмита томонидан ҳам, Сенат томонидан ҳам ташаббускорлик сезилмади. Шундан келиб чиқиб, тегишли қўмиталар агентлик билан ўзаро ҳамкорликни кучайтириши, мурожаатномада келтирилган ўта долзарб масалалар бўйича агентлик ҳисоботини доимий тарзда эшитиб бориши тизимини йўлга қўйиш самара беради, — деди сенат раиси.Видеоконференсалоқа шаклида бўлиб ўтадиган ялпи мажлисда бир қатор масалалар кўриб чиқилиши режалаштирилган. Ўзбекистон Президенти Шавкат Мирзиёевнинг Олий Мажлисга йўллаган Мурожаатномасида белгиланган вазифалар шулар жумласидандир.
Бундан ташқари, «Ўзбекистон Республикасининг Конституциясига ўзгартиришлар киритиш тўғрисида»ги, «Ўзбекистон Республикасининг Шаҳарсозлик кодексини тасдиқлаш ҳақида»ги, «Маданий фаолият ва маданият ташкилотлари тўғрисида»ги Ўзбекистон Республикаси қонунлари муҳокама қилиниши назарда тутилган.
Изоҳ (0)