Ўзбекистон иқтисодиёти 2021 йилда 4,3 фоизга, 2022 йилда эса 4,5 фоизга ўсади. Бу ҳақда Жаҳон банкининг январь ойидаги «Жаҳон иқтисодиёти истиқболлари» ҳисоботига таяниб, «Gazeta.uz» хабар берди.
Банкнинг баҳолашича, мамлакатнинг ЯИМ ўсиши 2020 йилда 0,6 фоизни ташкил этган. Октябрь ойида Жаҳон банки Ўзбекистон иқтисодиётининг 2020 йилдаги ўсиши 0,4 фоиздан 0,8 фоизгача, 2021 йилда — 4,8 фоиздан 5 фоизгача бўлишини прогноз қилганди.
Жаҳон банкининг прогнозларига кўра, 2021 йилда Марказий Осиё иқтисодиётининг ўсиши 3 фоизга қадар тикланади. Бунга хом ашё нархининг бироз кўтарилиш ва Хитойнинг «Бир макон — бир йўл» ташаббуси доирасида субминтақадаги иштирокининг фаоллашуви доирасида тўғридан-тўғри хорижий инвестициялар ҳажмининг ортиши сабаб бўлади.
Шу билан бирга, экспертларнинг таъкидлашича, Европа ва Марказий Осиё минтақаларида вазиятнинг салбий ривожланиш хавфи устунлик қилади.
«Айрим мамлакатларда ижтимоий хавотирни юзага келтирган сабаблардан бири ҳисобланувчи коронавирус пандемиясининг кучайиши, шунингдек, геосиёсий зиддиятларнинг ортиши хавфи ҳисобига минтақадаги иқтисодий ўсишнинг яқин истиқболлари ноаниқ қолмоқда», — дейилади ҳисоботда.
Таъкидланишича, минтақада коронавирус билан касалланишнинг ортиши чекловларнинг кучайишига ҳамда уй хўжаликлари ва компанияларнинг кескин жавобига олиб келиши мумкин.
Жаҳон банкининг прогнозларига кўра, 2020 йили коронавирус пандемияси сабаб юзага келган кескин қисқаришлардан сўнг дунёдаги ишлаб чиқариш 2021 йилда 4 фоизга кўтарилади. Экспертларнинг баҳолашича, 2021 йилда АҚШ ЯИМи 3,5 фоизга, Японияники 2,5 фоизга, 2020 йилда 2 фоизга ўсган Хитой ЯИМи эса 7,9 фоизга ўсади.
Эслатиб ўтамиз, 2020 йилнинг октябрида Европа тикланиш ва тараққиёт банки Ўзбекистоннинг ЯИМ бўйича 2021 йил прогнозини пасайтирган эди.
Изоҳ (0)