Грузия шифокорлари коронавирус инфекциясининг янги тури билан касалланиш ҳолатини аниқлади, дея хабар бермоқда «Интерфакс».
«Буюк Британияга бормаган беморда янги штамм аниқланди. У билан алоқада бўлган барча шахслар аниқланиб, изоляция қилинган. Ҳозирги вақтда беморнинг соғлиғи нормал ҳолатда ва у даволанишга тайёрланмоқда», – деди 4 январь куни Миллий соғлиқни сақлаш мониторинги маркази директорининг ўринбосари Паата Имнадзе.
Соғлиқни сақлаш вазирлигининг маълумотларига кўра, шу вақтгача Грузияда COVID-19 инфекцияси билан касалланишнинг 229 763 та ҳолати аниқланган. Беморларнинг 2628 нафари вафот этган.
Грузия ҳукумати 2020 йилнинг ноябрь ойи охиридан 1 февралгача жамоат ва шаҳарлараро транспорт воситалари, савдо марказлар ҳамда дўконлар фаолиятига, шунингдек, спорт ва маданий тадбирлар ташкил қилишга бир қатор чекловлар киритган.
Маълумот учун, ҳозиргача янги штамм Нидерландия, Австралия, Дания, Бразилия, Германия, Швейцария, Франция, Япония, Жанубий Корея, БАА, Иордания, АҚШ, Хитой ҳамда Туркияда ҳам аниқланган.
Изоҳ (0)