Ўзбекистонда Янги йил мавсуми вақтида пиротехника воситаларидан фойдаланиш оқибатида 120 дан ортиқ одам жароҳат олди, 6 та уйда ёнғин юзага келган. Бу ҳақда ИИВ матбуот котиби Шоҳрух Ғиёсов фуқароларга йўллаган мурожаатида маълум қилди.
Унинг сўзларига кўра, 12 миллион донадан ортиқ пиротехника маҳсулотлари мусодара қилинган, 258 киши маъмурий, 17 киши эса жиноий жавобгарликка тортилган. Шунингдек, яна 1048 та ҳолат бўйича ҳужжатлар судларга ва бошқа органларга қонуний чора кўриш учун йўналтирилган.
Пиротехника воситаларининг ноқонуний айланмасига қарши курашиш, рейдлар ва профилактик тадбирлар ўтказиш мақсадида ички ишлар, Миллий гвардия, солиқ ва бошқа органлар, шунингдек, жамоатчилик аъзоларидан иборат 800 дан ортиқ махсус гуруҳлар шакллантирилган.
Маълумот учун, 2009 йилнинг охирида ҳукумат Ўзбекистон ҳудудига пиротехника воситалари олиб кириш, ташиш, сақлаш, сотиш ва фойдаланишга вақтинчалик тақиқ ўрнатилган эди. 2010 йил 22 сентябрдаги қонун билан мамлакатда пиротехника воситаларини ноқонуний ишлаб чиқариш, тайёрлаш, сақлаш, ташиш, жўнатиш, ишлатиш, шунингдек, ноқонуний олиб кириш, экспорт қилиш ёки сотиш учун маъмурий ва жиноий жавобгарликни жорий этилган.
Аввалроқ Андижон вилоятида 738 миллион сўмлик пиротехника ва «Тропикамид» препарати мусодара қилингани, Тошкентда машинасидан 11 қути пиротехника буюми топилган 29 ёшли йигитга жиноят иши қўзғатилиб, қамоққа олингани ҳамда Оҳангаронда ноқонуний тарзда 6800 қутига яқин пиротехника воситалари олиб кетаётган юк машинаси аниқлангани ҳақида хабар берилганди.
Изоҳ (0)