Ўзбекистондаги ОТМларда ўқув жараёни босқичма-босқич кредит-модуль тизимига ўтказилади

Ҳукуматнинг тегишли қарори билан 2020/2021-ўқув йилидан бошлаб республика олий таълим муассасаларида ўқув жараёнини босқичма-босқич кредит-модуль тизимига ўтказиш тартиби жорий этилади. Бу ҳақда ЎзА хабар берди.

Қарорга кўра:

• ОТМда 3 йил ишлаб беришни назарда тутувчи шартномани расмийлаштирган ҳолда профессор-ўқитувчилар нуфузли хорижий олий таълим ташкилотлари ва илмий муассасаларда стажировка ўтайди ва малака оширади;
• ОТМда 5 йил ишлаб беришни назарда тутувчи шартномани расмийлаштирган ҳолда ўқитувчилар нуфузли хорижий олий таълим ташкилотлари ва илмий муассасаларнинг докторантура дастурлари асосида ўқитиш билан боғлиқ харажатлар амалга оширилади.

ОТМларнинг академик мустақиллигини янада кенгайтириш мақсадида 2021 йил 1 январдан бошлаб:

• ОТМлар ҳузуридаги техникумларда ўқув машғулотларини олиб бораётган ОТМ профессор-ўқитувчиларининг меҳнатига соатбай ҳақ тўлаш ОТМ талабаларига дарс ўтганлиги учун меҳнатга соатбай ҳақ тўлаш миқдорларида амалга оширилади;
• таълим жараёнини ташкил этишда ҳафталик ўқув кунлари ОТМлар томонидан мустақил белгиланади;
• ОТМларда ташкил этиладиган якуний давлат аттестация комиссияси раислари тегишли ОТМ ректори (филиал директори)нинг буйруғи билан тасдиқланади.

Шунингдек, қарор билан ОТМларда ўқув жараёнига кредит-модуль тизимини жорий этиш тартиби тўғрисида низом тасдиқланди ҳамда қуйидаги схема асосида босқичма-босқич жорий этилиши белгиланган:

Эслатиб ўтамиз, 2020 йил апрель ойида «Шарқшунослик соҳасида кадрлар тайёрлаш тизимини тубдан такомиллаштириш ва илмий салоҳиятни ошириш чора-тадбирлари тўғрисида​»​ Президент қарори билан Тошкент давлат шарқшунослик институти негизида Тошкент давлат шарқшунослик университети ташкил этилган, ҳужжатда университетда таълим жараёни босқичма-босқич кредит-модуль тизими асосида амалга оширилиши белгиланганди.

Май ойида эса Тошкент темир йўл муҳандислари институти, Тошкент автомобиль йўлларини лойиҳалаш, қуриш ва эксплуатацияси институти ва Тошкент давлат техника университетининг авиакосмик технологиялари факультети негизида Тошкент транспорт университети ташкил этилиши, 2020/2021-ўқув йилидан университетда кредит-модуль таълим тизими жорий қилиниши ҳақида хабар берилган.

Июнь ойида жамоатчилик муҳокамасига қўйилган «Андижон қишлоқ хўжалиги ва агротехнологиялар институти фаолиятини ташкил этиш ҳамда аграр таълим тизимини янада такомиллаштириш чора-тадбирлари тўғрисида»ги Президент қарори лойиҳасида ҳам институтда бакалавриат таълим йўналишларида таълимнинг кредит-модуль тизимини босқичма-босқич жорий этилиши хусусида маълумот берилганди.