Хитой раҳбарияти COVID-19’ни келтириб чиқарадиган SARS-CoV-2 вирусининг келиб чиқиши бўйича тадқиқотларни қаттиқ назорат қилмоқда. Бу ҳақда Аssociated Press хабар қилди.
Хитой ҳукумати вируснинг келиб чиқишини ўрганаётган олимларга юз минг АҚШ долларилик грантлар ажратмоқда. Расмийлар тадқиқот натижаларини кузатиб бормоқда. Шунингдек, расмийлар олимлардан тадқиқот натижалари ҳукумат томонидан тузилган махсус гуруҳ тасдиқлагандан сўнг чоп этишни талаб қилмоқда.
Бундан ташқари, агентлик маълумотларига кўра, Хитой жанубида жойлашган Юньнань провинциясидаги кўршапалаклар яшайдиган ғорлар Хитой «ҳукуматнинг доимий эътиборида» турибди. АP мухбирлари Юньнандаги бир нечта ғорларга кира олмаган. Агентлик маълумотларига кўра, мухбирларни ғорларга киришига уларни бутун вилоят бўйлаб кузатиб борган Хитой давлат хавфсизлик агентлари рухсат бермаган.
Айниқса, 2013 йилда RaTG13 вируси (SARS-CoV-2 вирусининг энг яқин генетик қариндоши) топилган кўршапалаклар яшайдиган ташландиқ кон қаттиқ ҳимояланган.
COVID-19 эпидемияси бошланиши билан хитойлик олимлар SARS-CoV-2 вирусининг асосий манбаи бўлган ҳайвонларни, жумладан, Юньнандаги кўршапалакларни ҳам ўрганишни бошлаган
2020 йил февраль ойида Хитойдаги давлат оммавий ахборот воситалари ҳукумат томонидан 214 минг доллар миқдорида грант олган олимлар гуруҳи тадқиқот учун Юньнань провинциясида юзлаб кўршапалаклар ва бошқа ҳайвонларнинг намуналарини тўплаганликлари ҳақида хабар берди.
Тадқиқот маълумотлари ҳалигача нашр этилмади. Ҳукумат томонидан қўллаб-қувватланмайдиган олимларнинг АP’га айтишича, улар учун жанубий Хитойда ҳайвонларни ўрганиш учун рухсат олиш жуда қийин.
Юньнань провинциясидаги ғорларга кириш билан боғлиқ қийинчиликлар ҳақида BBC News 2020 йил декабрида ҳам хабар берган. АP ҳам, BBC News ҳам SARS-CoV-2’нинг Хитойдан келиб чиқишини ўрганиш бўйича расмий маълумотлар жуда камлигини таъкидлади. Шу билан бирга, Хитой пропагандаси вирус Хитойда пайдо бўлмаганлигини даъво қилмоқда, деб хабар берган BBC News.
Пентагон 2020 йил апрель ойида коронавирус табиий усулда келиб чиққанига етарли далиллар борлигини билдирганди. Шунингдек, АҚШ давлат котиби коронавирус пандемиясида айбдорлар жавобгарликка тортилишини айтганди.
Изоҳ (0)