«Ижтимоий фикр» республика жамоатчилик фикрини ўрганиш маркази «Ўзбекистон: жамоатчилик фикри — 2020» мавзусида комплекс социологик тадқиқот ўтказди. Унда «Илм, маърифат ва рақамли иқтисодиётни ривожлантириш йили»да мамлакатнинг ижтимоий-иқтисодий ва ижтимоий-сиёсий ривожланиши ҳақида фуқароларнинг фикри ўрганилди, ўзбекистонликларнинг ижтимоий кайфияти ҳамда давлат ва жамият ҳаётининг асосий соҳаларида эришилган натижалардан аҳолининг қониқиш даражаси аниқланди.
Қайд этилишича, жамоатчилик фикри бевосита юзма-юз сўров, телефон сўрови ва интернет тармоғида ўтказилган сўровлар орқали амалга оширилди. Унда мамлакатнинг барча минтақалари аҳолиси, эркаклар ва аёллар, ёшлар ва катта ёшдагилар, шаҳар ва қишлоқ аҳолиси, турли ижтимоий гуруҳлар вакиллари иштирок этди.
2020 йил якунлари бўйича ўтказилган жамоатчилик фикри сўровининг кўрсатишича, ўтаётган йил мамлакат ва жамият учун, ҳар бир ўзбекистонликнинг оиласи учун синов бўлди, кўпчилик томонидан у мисли кўрилмаган мураккаб йил сифатида қабул қилинмоқда, фуқаролар «унинг тезроқ тугаши»ни хоҳлайди. Лекин дуч келинган барча муаммолар ва қийинчиликларга қарамасдан, сўров иштирокчиларининг фикрича, бу йил «кутилган даражада ёмон йил бўлмади», асосий кўпчиликнинг ҳаёти бир маромдаги изга тушди.
Сўров жараёнида 62,9 фоиз сўров иштирокчилари 2020 йилдаги мураккаб санитар-эпидемиологик шароитларга қарамасдан янги иш ўринлари яратиш, бандликни таъминлаш муаммоларини ҳал қилиш ва фуқароларнинг реал даромадларини ошириш бўйича самарали чоралар кўрилганини қайд этган.
Тадқиқот натижаларидан маълум бўлишича, жамоатчилик фикрида аҳолининг долзарб муаммоларини ҳал қилиш бўйича давлат ҳокимияти ва бошқаруви органларининг фаолиятига ижобий баҳолар устуворлик қилади. Масалан, мамлакатнинг 62,3 фоиз аҳолиси уларнинг ишини «яхши» деб баҳолаган, сўралганлардан учдан бир қисмининг ҳисоблашича, давлат ҳокимияти ва бошқаруви органларининг фаолиятини «қониқарли» деб баҳолаш мумкин.
Сўровномада иштирок этганларнинг фикрича, COVID-19 пандемияси ва мамлакатда у билан боғлиқ карантин чекловларига қарамасдан корхоналар фаолиятини тиклаш бўйича амалга оширилган тизимли ишлар туфайли Ўзбекистонда иқтисодиётнинг пасайишига йўл қўйилмади. Давлат томонидан ўз вақтида кўрилган чора-тадбирлар натижасида асосий қисм аҳолининг даромад манбалари ва турмуш даражасини сақлаб қолишга муваффақ бўлинди. Сўров жараёнида унинг 39,5 фоиз иштирокчилари 2020 йилда ўзларининг моддий аҳволи ўзгармаганлигини, 5,7 фоиз респондентлар эса яхшиланганлигини қайд этган. 38,5 фоиз сўралганларнинг жавобларига мувофиқ, уларга ушбу йилда кўпроқ куч-ғайрат сарфлашга тўғри келган бўлса-да, оилаларининг фаровонлиги аввалги даражада қолди.
Сўровнинг кўрсатишича, мамлакат фуқаролари давлат бошқаруви тизимини такомиллаштиришга, ҳар бир фуқаро ва умуман жамият ҳуқуқларини ҳимоя қилиш ва таъминлашга қаратилган иқтисодий ва ижтимоий ислоҳотлар Ўзбекистондаги ҳар бир оиланинг ҳаётига ижобий таъсир кўрсатишига ишонади. Сўров иштирокчилари кириб келаётган 2021 йилда ўз оиласининг моддий аҳволидаги ўзгаришлар истиқболларини оптимистик баҳолаган. Ҳар иккинчи респондент (50,5 фоиз) 2021 йилда ўз оиласининг фаровонлиги ўсишига ишонади, 29,1 фоиз респондентларнинг фикрича, турмуш даражаси аввалги ҳолатда қолади.
Сўров натижаларининг кўрсатишича, кўпчилик респондентларга оптимистик кайфият хосдир. 72,5 фоиз сўралганлар барча мамлакатлар ва халқларнинг равнақига, эзгулик ва тинчлик тантанасига умид, ишонч туйғуларини ҳис қилишларини билдирган. 16,2 фоиз сўров иштирокчиларининг кўрсатишича, 2020 йилда юз берган глобал ўзгаришлар уларда ҳаёт оқими қай томонга ҳаракатланаётганини англамаслик, коронавирус пандемияси билан боғлиқ қийинчиликларни келажакда бартараф этишга ишончсизлик каби мавҳум туйғуларни уйғотмоқда.
Изоҳ (0)