Og‘ir yilning olg‘irlari: 2020-yilning eng yaxshi transferlari haqida

Dekabr oyining so‘nggi kuni ham o‘tib bormoqda, shunday ekan 2020-yilning yakunlarini sarhisob qilishning ayni vaqti. Ortda qolayotgan yil ko‘pchilik uchun har tomonlama og‘ir kechgani bor gap, ammo bu so‘zlarning hozir fikr yuritiladigan futbolchilarga umuman daxli yo‘q. Boisi ular aynan mazkur yilda ijobiy natijalarga erishdi.

“Daryo” quyida o‘quvchilarga 2020-yilning eng yaxshi transferlarini havola etadi.

Luis Suares: “Barselona”dan “Atletiko”ga

Ro‘yxatni “Barselona” afsonasi Luis Suares ochib beradi.  Uzoq yillar davomida katalon klubi sharafini himoya qilgan va u bilan ko‘plab sovrinlarni qo‘lga kiritgan Suaresdan shunchaki voz kechildi. Uning shuncha yillik  mehnatlari qadrlanmadi ham. Biroq iste’dod xor bo‘lmaydi deganlaridek, u darrov o‘ziga yangi jamoa topdi – Madridning “Atletiko” klubi uni quchoq ochib kutib oldi. 33 yoshli urugvaylik hujumchi yangi jamoasida shu qadar ajoyib va foydali harakat qilmoqdaki, go‘yo u o‘zining ikkinchi yoshligini o‘tkazayotgandek taassurot uyg‘onmoqda. Ayni damda Suares 7 ta gol bilan Ispaniya La Ligasining eng yaxshi to‘purarlaridan biri bo‘lib turibdi.

“Siti” 27 million yevro evaziga 20 yoshli ispaniyalik futbolchini “Bavariya”ga ketgan Leroy Sanening o‘rnini to‘ldirish uchun xarid qildi. Torres “shaharliklar” bilan besh yillik shartnoma imzoladi. Hozircha bu transfer o‘zini to‘laligicha oqlamoqda. “Man Siti”ga o‘tish va Gvardiola qo‘l ostida to‘p surish vinger uchun tramplin vazifasini o‘tamoqda. Torres allaqachon “shaharliklar” safida 7 ta gol urishga va hatto Ispaniya terma jamoasida debyut qilish barobarida het-trikni amalga oshirishga ulgurdi. Hozirda uning transfer qiymati 50 million yevroga baholanmoqda.

Ashraf Hakimi: “Real”dan “Inter”ga

“Real” tarbiyalanuvchisi o‘z klubida qadr topmadi va so‘nggi ikki mavsumni ijara asosida “Borussiya Dortmund”da o‘tkazdi. Aynan o‘sha yerda u futbolchi sifatida ochildi va boshqa klublar e’tiborini o‘ziga qaratishga muvaffaq bo‘ldi. Nemis klubi uni sotib olmaslikka qaror qilgach, “Inter” Hakimini o‘z safiga qo‘shib oldi va yiliga 5 million yevro maoshli besh yillik shartnoma imzoladi. Marokashlik A Seriyaga juda tez moslashdi va Antonio Konte boshchiligidagi “Inter”ning asosiy o‘yinchisiga aylandi. Samaradorlik borasida ham unga istalgan himoyachi faqat havas qilishi mumkin – 14 ta o‘yin, 4 ta gol va 3 ta assist.

Edinson Kavani: PSJdan “Manchester Yunayted”ga

PSJ tarixidagi eng yaxshi hujumchilardan (200 ta gol va 6 ta sovrin) biri 2019/20-yilgi mavsum yakunlariga ko‘ra jamoani tark etadigan bo‘ldi. Urugvaylik hujumchining Parij klubi bilan shartnomasi nihoyasiga yetdi, PSJ esa kelishuvni uzaytirmaslikka harakat qildi. Shu tariqa taniqli hujumchining faoliyatini qayerda davom ettirishi so‘roq ostida qoldi. Asosan, uni MLS bilan bog‘lashdi. Ammo Kavani transfer oynasining so‘nggi kunida “Manchester Yunayted” bilan kelishuvga erishdi. Ingliz klubi Edinson bilan 1+1 ko‘rinishidagi shartnoma imzoladi. Kavani Premyer Ligada ham “yo‘qolib” qolgani yo‘q, garchi asosiy tarkibdan muqim o‘rin ololmagan bo‘lsa-da, u o‘z imkoniyatlaridan a’lo darajada foydalanmoqda va uni hisobdan chiqarganlarga o‘zining nimalarga qodirligini yana bir marta isbotlab qo‘ydi.

Eduard Mendi: “Renn”dan “Chelsi”ga

Kepaning “qovun”laridan toqati toq bo‘lgan “Chelsi” nihoyat kuzda o‘ziga yangi darvozabon xarid qildi. “Aristokratlar” muxlislari Mendini allaqachon “yangi Chex” deb atashni boshlab yuborgan. London klubi “Renn” darvozaboni uchun 24 million yevro sarfladi. Mendi Frenk Lempard qo‘l ostida o‘tkazgan 16 o‘yinning 10 tasida darvozasi daxlsizligini saqlab qoldi.

Jotaning transferi uchun “Liverpul” naq 45 million yevro to‘ladi. Bu Saloh yoki Manega sarflangan mablag‘dan ko‘proq edi. Ammo Jota o‘z o‘yini bilan potensial jihatidan na senegallik va na misrlikdan qolishmasligini isbotlamoqda. U Kloppning o‘yin sxemasiga juda mos keladi va bir vaqtning o‘zida bir nechta pozitsiyalarni yopishi mumkin. “Liverpul” safida 17 uchrashuvdan so‘ng portugaliyalik futbolchining hisobida 9 ta gol, jumladan, Chempionlar Ligasidagi het-trik bor.

Morataning “Yuventus”ga qaytishi ham o‘tgan yilgi  transfer bozorining asosiy voqealaridan biri bo‘ldi. Ispaniyalik Ronaldu bilan birgalikda ajoyib tandem yarata oldi. Morata “keksa sinyora” safida 17 uchrashuvda maydonga tushib, 10 ta gol va 5 ta golli uzatmani amalga oshirdi. Shubha yo‘qki, “Yuve” allaqachon futbolchining to‘liq transferini qo‘lga kiritish borasida ish olib bormoqda.

Zlatan Ibragimovich: “Los-Anjeles Gelaksi”dan “Milan”ga

Yosh shunchaki oddiy raqam ekanligini isbotlab kelayotgan Zlatan 39 yoshida ham Yevropani qaytadan zabt etmoqda. Yil boshida dastlab “Milan” bilan yarim yillik (keyin tomonlar kelishuvni yana bir yilga uzaytirdi) shartnoma imzolagan shved bugungi kunga kelib, jamoaning tom ma’nodagi yuragi hisoblanadi. Aynan u kelganidan keyin jamoa o‘zining avvalgi mavqeyini tiklay boshladi. Uning samaradorligiga esa gap-so‘z bo‘lishi mumkin emas.

Bir qancha muvaffaqiyatsiz transferlardan keyin nihoyat “Yunayted” ajoyib tanlovni amalga oshirdi. Brununing transferi klub uchun 55 million yevroga tushgandi, ammo portugaliyalik o‘z o‘yini bilan bu pullardan-da ko‘prog‘iga arzishini isbotladi. Fernandesh “qizil iblis”larning haqiqiy yetakchisiga aylandi, klub muxlislari esa uni allaqachon Ronaldu bilan taqqoslashni boshlab yubordi. Brunu nafaqat jamoa o‘yinini nazorat qiladi, balki deyarli hech bir bahsni golsiz tark etmaydi.

Erling Holand: “Zalsburg”dan “Borussiya D”ga

Dortmundning “Borussiya”si yilning eng yaxshi transferiga qo‘l urdi deb bemalol aytish mumkin. “Arilar” norvegiyalik katta iste’dod egasi uchun atigi 20 million sarflagandi. Hozir esa Holand dunyoning eng qimmat futbolchilari qatorida tilga olinadi. Aytish joizki, Erling futbol olamida 2020-yilda koronavirusdan-da ko‘proq shov-shuv ko‘tara oldi.

2020-yilgi Golden Boy sovrini sohibi uchun bugungi kunda Yevropaning eng nomdor jamoalari kurash olib bormoqda, jarayonni esa koronavirus oqibatida kelib chiqqan inqiroz sekinlashtirib turibdi. Futbol muxlislari 2021-yilning yoziga kelib, Holandni biror top-klub safida ko‘rishsa ajab emas. Uning statistikasi haqida esa yaxshisi gapirmagan ma’qul.