25 декабрь куни Рождество тонгида Американинг Теннесси штати пойтахти Нэшвилл шаҳри марказида ғилдиракли уй портлаб кетди, деб ёзади Meduza. Бунинг оқибатида бир киши — автотрейлернинг 63 ёшли хўжайини Энтони Куинн Уорнер вафот этди. Полициячилар фургон ичидан эшитилган, портлаш ҳақидаги огоҳлантиришни эшитмаганида ва яқин атрофдаги бинолардан одамларни эвакуация қилмаганида, қурбонлар кўпроқ бўлиши мумкин эди. Норасмий маълумотларга кўра, портлашга Уорнернинг 5G технологиялари борасидаги «паранойя»си сабаб бўлган бўлиши мумкин.
Ўзи нима бўлган эди?
25 декабрь куни эрталаб 6:30 да Нэшвилл марказида ғилдиракли уй портлаб кетди. Портлашдан олдин ундан аёл кишининг «компьютерлаштирилган» баланд овози янграган. Овоз автомобиль 15 дақиқадан кейин портлаши ҳақида огоҳлантирган ва портлашгача қолган вақтни тескари тартибда санай бошлаган. «Агар бу хабарни эшитаётган бўлсангиз, зудлик билан эвакуация қилинг», — деган овоз.Шу билан бир вақтда автотрейлер динамикларидан британиялик қўшиқчи Петула Кларкнинг Downtown қўшиғи янграган. 1964 йилда чиққан қўшиқ «бир ўзинг бўлганингда ва ҳаёт сени ёлғиз ҳис қилдираётган бўлса, шаҳар марказига бор» деган сўзлар билан бошланади. Кейин эса у ерда «чироқлар анча ёрқинроқ» эканлиги ва «муаммолар ва ташвишлар ҳақида» унутиш мумкинлиги айтилади.
Портлаш содир бўлган кўча Нэшвилл марказида жойлашган, у ерда тарихий бинолар кўп бўлиб, улар кафе ва барларни ўз ичига олган. Автотрейлер Американинг АТ&Т телекоммуникация компаниясининг дата-маркази яқинида тўхтаб турган. Портлаш тўлқини яқинда жойлашган уйларнинг ойналарини синдирди, АТ&Т офиси қаршисида жойлашган бинонинг олд қисмини вайрон қилди, учта автомобилни йўқ қилди, дарахтларни қулатди.
Бундан ташқари, дата-марказга етган зарар туфайли Теннессининг баъзи қисмларида, шунингдек, Қўшни Алабама ва Кентукки штатларида уяли алоқа ва интернет вақтинчалик ишламай қолди. Бунинг натижасида полиция ва тиббиёт муассасаларининг фавқулодда рақамларига ҳам тушиб бўлмаган.
https://twitter.com/MNPDNashville/status/1343362483411628033
Кимлар жабрланди?
Портлаш оқибатида бир киши ҳалок бўлди. Бу 63 ёшли Энтони Куинн Уорнер. У автотрейлер эгаси бўлган ва воқеа жойидан топилган одам қолдиқларининг ДНК-таҳлилига кўра, фургон портлаган вақтда унинг ичида бўлган.https://twitter.com/FBIMemphis/status/1343388799703900161
Яна уч киши жароҳатлар билан касалхонага етказилган: улар барқарор ҳолатда. Агар воқеа жойига полициячилар бориб қолмаганида қурбонлар кўпроқ бўларди. Полиция ходими Жеймс Луэллин ўқ узилганлиги ҳақидаги хабарлар туфайли фургон турган кўчага етиб келган. Бу маълумот тасдиқланмаган, қайтага полициячи портлаш ҳақидаги огоҳлантиришни эшитиб қолган.
Луэллин қўшимча кучларни чақирган, унга ёрдам бериш учун яна беш ҳамкасби етиб келган. Улар биргаликда ғилдиракли уй тўхтаб турган даҳага кириш жойларини тўсиб қўйган ва қўшни уйлар эшикларини тақиллатиб, одамлардан хавфсиз масофага узоқлашишни илтимос қила бошлаган. Улар уйдан чиқариб юборган одамлар орасида тўрт болали аёл ҳам бўлган.
26 декабрь куни олти полициячининг беш нафари матбуот анжуманида қатнашди, у ерда уларга одамлар ҳаётини сақлаб қолгани учун миннатдорлик билдирилди. «Бу бизни бир умрга, ҳаётимизнинг қолган қисми давомида боғлаб туради. Рождество энди ҳеч қачон аввалгидек бўлмайди», — деди портлаш оқибатида эшитиш қобилиятидан қисман маҳрум бўлган офицер Жеймс Уэллс.
https://twitter.com/MNPDNashville/status/1343271118615027718
Ким айбдор?
ФҚБ фикрича, портлашни Энтони Куинн Уорнернинг ўзи содир этган. Унинг шериклари бўлмаган, деб тахмин қилинмоқда. Федерал агентлар кузатув камераларидан олинган кўп соатли қайдларни кўриб чиқиб, шундай хулосага келди: портлашдан олдин кўчада Уорнердан бошқа ҳеч ким бўлмаган. Америкаликнинг хатти-ҳаракатини тергов оммавий қотиллик содир этишга уриниш эмас, балки ўз жонига қасд қилиш деб ҳисоблади.Уорнер Нэшвилл ташқарисида — Антиохиядаги икки қаватли уйда яшаган, у шаҳар марказидан, тахминан, 18 километр узоқликда жойлашган. У ёлғиз яшаган ва Daily Mail маълумотларига кўра, марҳум акасининг мероси туфайли онаси билан ўрталарида келишмовчилик бўлган. Уорнернинг танишлари уни тинч, хотиржам, бироз ғалати одам, «компьютер ботаниги» сифатида тавсифлади. У IТ соҳасида фрилансер бўлиб ишлаган. Шунингдек, 1990 йилларда у қўриқлов сигнализациялари савдоси бўйича бизнесга эгалик қилган.
Марҳумга буюртмалар берган Fridrich & Clark Realty кўчмас мулк агентлиги раҳбари Стив Фридрих ФҚБга маълум қилишича, декабрь бошида Уорнер унга пенсияга чиқаётганини айтган. Шунингдек, Уорнер собиқ маъшуқасига машинасини совға қилиб юборган ва унда онкологик касаллик борлигини айтган (бу рост ёки ёлғонлиги ноаниқ). Бундан ташқари, матбуот маълумотларига қараганда, вафотидан бир ой аввал у ўз уйини лос-анжелеслик Мишель Суинг исмли аёл номига ўтказган. Унинг Уорнерга қандай боғлиқлиги борлиги номаълум.
Шу пайтгача Уорнер ҳеч қачон полиция эътиборига тушмаган. У бу қилмишини нима мақсадда амалга оширгани ҳозирча аниқ эмас. Associated Press манбасига кўра, Уорнер АТ&Т оператори биносини нишонга олган бўлиши ҳам мумкин (унинг ғилдиракли уйи портлашдан олдин шу ерда тўхтаб турганди).
ФҚБ агентлари Уорнернинг қўшниларидан унда 5G борасида «паранойя» бўлган-бўлмаганлиги ҳақида сўраган. Фитна назарияси тарафдорлари фикрича, ушбу алоқа технологияси одамларни кузатиш, онкологик касалликлар ва коронавирус тарқатиш мақсадларида қўлланилиши мумкин.
Daily Mail’нинг текширувга яқин манбасига қараганда, Уорнер ростан ҳам 5G одамларни ўлдириш учун қўлланилади, деган фикрда бўлган. У 2011 йилда отаси деменция (ақли пастлик)дан вафот этганидан кейин бунга ишонишни бошлагани ҳақидаги версия текширилмоқда. FOX манбалари маълум қилишича, Уорнернинг отаси 2006 йилда АТ&Т таркибига кирган БеллSouth компаниясида кўп йиллар ишлаган.
«Ҳозирча норасмий мотив шундан иборатки, гумонланувчи 5G ўлимларга сабаб бўлишини, портлашдан кейин уни қаҳрамон деб эълон қилишларини тахмин қилган», — деди Daily Mail ҳамсуҳбати.
Изоҳ (0)