Аргентинада 29 декабрь куни аҳолини Россиянинг «Спутник V» вакцинаси ёрдамида COVID-19 касаллигига қарши эмлаш бошланди, деб хабар беради Аргентина оммавий ахборот воситаларига таяниб «Интерфакс».
Вакцинация мамлакатнинг барча тўққиз вилоятида бир вақтда бошланди. Ушбу босқичда асосан тиббиёт ходимлари эмланади. Буэнос-Айресда биринчи бўлиб губернатор Алекс Кисиллофф, вилоят соғлиқни сақлаш вазири Николас Креплак ва ҳамшира эмланган.
Эслатиб ўтамиз, 23 декабрь куни Аргентина мамлакатда «Спутник V» вакцинасидан фойдаланишни маълум қилди.
Кейинчалик Россия тўғридан-тўғри инвестиция жамғармаси Аргентинага 300 минг доза «Спутник V» вакцинасини етказиб берилиши ҳақида хабар берди. Жамғарманинг таъкидлашича, бу режалаштирилган 10 миллион дозанинг бир қисми бўлган.
Гамалея илмий марказининг директори Александр Гунзбург таъкидлашича, Аргентина «Спутник V» вакцинасининг фақат биринчи компонентини олган, иккинчиси уч ҳафта ичида етказиб берилади.
Аргентина «Спутник V» вакцинасидан ташқари, АҚШнинг Pfizer ва Германиянинг BioNTech компаниялари томонидан ишлаб чиқарилган вакциналарни ҳам тасдиқлаган.
Эслатиб ўтамиз, айни вақтгача Буюк Британия, Россия, АҚШ, Швейцария, БАА, Венгрия, Германия, Франция, Испания, Австрия, Болгария, Чехия, Италия, Словакия ҳамда Грецияда оммавий эмлаш бошланган.
Изоҳ (0)