Шавкат Мирзиёев 29 декабрь куни парламентга мурожаат билан чиқиш чоғида ҳукуматга давлат бошқаруви тизими самарадорлигини ошириш вазифасини топширди.
2021 йилда давлат бошқаруви органлари фаолиятини тубдан такомиллаштириш режалаштирилмоқда.
«Кўпгина вазирлик идоралар фаолиятида қарор қабул қилиш ҳаддан ташқари марказлашган. Уларнинг вазифалари аниқ белгиланмаганлиги сабабли уларнинг фаолиятларида бир-бирларини такрорлаш ҳолатлари мавжуд. Бундан ташқари, вазир ўринбосарлари, ўрта бўғин раҳбарлари масъулиятни ўз бўйнига олмаяпти, ташаббус кўрсатмаяпти. Нима учун бундай бўляпти? Уларда билим, кўникма ва масъулият ҳисси йўқ ёки коррупцияга берилган», — деган давлат раҳбари.
Шавкат Мирзиёевнинг фикрича, рақамли технологияларни кенг жорий этиш ҳисобидан ходимлар сонини ва иш жараёнларини оптималлаштириш чоралари ҳали ҳам кўрилмаяпти.
Шу сабабли ҳукуматга икки ой муддатда бошқарувда бир-бирини такрорлайдиган идоралар ва функцияларни, ортиқча бюрократик тўсиқларни қисқартириш бўйича ҳужжатлар лойиҳаларини тайёрлаш вазифаси топширилди. Бунда давлат бошқаруви ходимлари сонини ўртача 15 фоизгача оптималлаштиришни назарда тутиш зарур ҳисобланади.
Президент, шунингдек, жойларда муаммоларни ҳал қилишда давлат органларининг масъулияти ва жавобгарлиги кучайтирилишини таъкидлади. Келаси йил бошидан ҳар бир вазирлик ўз ишини туман, шаҳар, қишлоқ ва маҳалла кесимида режалаштиради ва ташкил этади. Вазирлар ва уларнинг ўринбосарлари фаолиятига туман, шаҳар, қишлоқ ва маҳаллада амалда қандай ўзгариш бўлганига қараб баҳо берилади.
Бош вазир ўринбосарлари, вазирлар, ўзларининг қуйи тизим раҳбарлари ва ходимларини янгича талаблар ва замонавий ахборот технологиялари асосида самарали ишлашга ўргатиш ва малакасини мунтазам ошириб бориш учун масъул бўлади.
«Депутат ва сенаторларни ўзлари сайланган ҳудуддаги муаммолар, тегишли вазирлик ва ҳокимликлар томонидан қай даражада ҳал этилаётганини доимий ўрганиб, назорат қилиб боришга чақираман», — деб таъкидлаган давлат раҳбари.
Шавкат Мирзиёев туман, шаҳар ва маҳалла бошқарувида самарадорликни ошириш учун ходимлар сони ва маошини ҳудуднинг ўзига хослиги ва иш ҳажмидан келиб чиқиб белгилаш лозимлигини таъкидлади. Масалан, Самарқанд вилоятининг Пахтачи туманида 150 минг, Ургут туманида 500 мингдан ортиқ аҳоли яшайди. Ёки Шайхонтоҳур тумани аҳолиси қарийб 350 минг, Бектемирда эса 46 минг нафар. Лекин, ушбу туманларда бошқарув ходимлари сони ва уларнинг иш ҳақи бир-биридан катта фарқ қилмайди.
Ҳукумат икки ой муддатда ўрта ва қуйи бўғин бошқарув идораларининг фаолиятини тубдан такомиллаштириш, улардаги ходимлар сони ва меҳнатига ҳақ тўлаш шартларини қайта кўриб чиқиш бўйича қарор лойиҳасини киритиши лозим.
Изоҳ (0)